Ályktun þingflokks vegna dönsku löggjafar um innflytjendur

Ný löggjöf um málefni innflytjenda í Danmörku hefur mætt andstöðu mannréttindasamtaka víða um heim, sem og Sameinuðu þjóðanna. Í lögunum eru reglur hertar er varða innflytjendur og flóttafólk sem leita hælis í Danmörku, eignaupptöku verðmæta er heimiluð og þrengt að fjölskyldusameiningum.

Löggjöfin stríðir gegn þeim almenna anda sáttar, mannréttinda og gestrisni sem einkennt hefur Norðurlöndin í sögulegu ljósi þegar kemur að móttöku flóttamanna sem flýja stríðshrjáð lönd auk þess sem hún samræmist hvorki Flóttamannasáttmála Sameinuðu þjóðanna, Barnasáttmála Sameinuðu þjóðanna né Mannréttindasáttmála Sameinuðu þjóðanna.

Þingflokkur VG tekur undir með þeim sem hafa fordæmt löggjöfina og leggur áherslu á að sambærileg ákvæði rati aldrei í íslenska löggjöf.