VG Í HAFNARFIRÐI ÁLYKTAR UM KAUP Á ÍÞRÓTTAMANNVIRKJUM

VG í Hafnarfirði fordæma vinnubrögð meirihluta Bæjarráðs vegna ákvörðunar sem tekin var á aukafundi ráðsins þann 8. ágúst sl. um kaup á íþróttahúsum í Kaplakrika að upphæð 790 miljónir í þeim tilgangi að FH geti byggt knattspyrnuhús. Þetta kemur fram í yfirlýsingu frá VG í Hafnarfirði. 

„Jafnframt tökum við undir bókanir fulltrúa minnihlutans á fundinum um að ekki liggi fyrir verðmat á eignunum, ekki sé gert ráð fyrir upphæðinni í fjárhagsáætlun og að ekki hafi farið fram opin umræða meðal kjörinna fulltrúa né almennings um málið, og að horfið sé frá fyrri ákvörun um 100% eignarhald bæjarins á íþróttamannvirkjum.

Við leggjum áherslu á að við svo stóra ákvörðunartöku séu viðhöfð ábyrg og lýðræðisleg vinnubrögð með aðkomu allra kjörinna fulltrúa.

VG styður uppbyggingu íþróttamannvirkja í bænum en gerir kröfu um málefnalega og lýðræðislega umræðu um eignarhald og fjármögnun til að tryggja sátt um framkvæmdir.

Vinstri hreyfingin grænt framboð í Hafnarfirði“

 

Ályktanir og tillögur Flokksráðsfundar Vinstrihreyfingarinnar – græns framboðs 27. janúar 2018

Flokksráðsfundur Vinstrihreyfingarinnar – græns framboðs 27. janúar 2018 samþykkti á fundi sínum eftirfarandi tillögur/ályktanir:

  1. Um stuðning við sjálfstæðishreyfingar:

Flokksráðsfundur Vinstri hreyfingarinnar, græns framboðs haldinn í Reykjavík 27. janúar 2018 skorar á þingmenn og ráðherra VG að vera vakandi í stuðningi við sjálfstæðishreyfingar þjóða og skjótir til viðurkenningar, þegar þær lýsa yfir sjálfstæði.

  1. Tillaga um nýja aðgerðaráætlun gegn einelti og kynbundnu ofbeldi

Flokksráðsfundur VG á Grand Hótel 27. janúar 2018 felur stjórn hreyfingarinnar að skipa í starfshóp um endurskoðun aðgerðaráætlunar Vinstrihreyfingarinnar – græns framboðs gegn einelti og kynbundnu ofbeldi. Hópurinn mun fara yfir áætlunina með athugasemdir sem komið hafa fram í tengslum við #metoo byltinguna til hliðsjónar. Umræða þarf að fara fram innan hreyfingarinnar á breiðum grundvelli, til dæmis á opnu málþingi, og ný aðgerðaáætlun verður svo kynnt flokksráði á fundi ráðsins í ágúst þar sem hún verður borin upp til samþykktar.

  1. Tillaga um skipan starfshóps um mótun stefnu gegn spillingu

Flokksráðsfundur Vinstri hreyfingarinnar – græns framboðs, haldinn á Grand hótel 27. janúar 2018, samþykkir:

Að skipaður verði starfshópur er hafi það verkefni að móta stefnu VG gegn spillingu og leggi fram að vori tillögu að stefnu sem og aðgerðaáætlun, sem sýni hvernig VG hyggst vinna að útrýmingu spillingar í íslensku samfélagi.

Starfshópurinn skal í tillögu sinni að stefnu taka mið af því starfi, sem unnið hefur verið af Transparency International, sem og skilgreiningu þeirra samtaka á spillingu og öðrum hugtökum sem skilgreina þarf.

Ályktanir sem sendar voru áfram til sveitastjórnarráðs voru tvær.

  1. Aukið íbúalýðræði

Ályktun um breytingar á sveitastjórnarlögum nr. 138/2011.

  1. Um félagsþjónustu sveitarfélaga

Ályktun um breytingar á lögum nr. 40/1991 um félagsþjónustu sveitarfélaga.

 

Áskorun ungliða

Ungliðarhreyfingar stjórnmálaflokka senda frá sér eftirfarandi ályktun: Ung vinstri græn, Uppreisn, Samband ungra framsóknarmanna, Ungir jafnaðarmenn, Ungir sjálfstæðismenn og Ungir píratar fagna því að konur séu að stíga fram og rjúfa þögnina um kynferðislega áreitni, ofbeldi og valdbeitingu innan stjórnmála. Slík hegðun á ekki að líðast, hvorki innan stjórnmála né nokkurs staðar annars staðar í samfélaginu.

Þegar slík misbeiting valds fær að viðgangast ýtir sú háttsemi undir að stjórnmálaumhverfið sé konum fjandsamlegt og getur leitt til þess að konur fái færri tækifæri og endist skemur í stjórnmálum. Því er gríðarlega mikilvægt að opin umræða eigi sér stað um misbeitingu sem þessa og að skýrir verkferlar séu til staðar innan stjórnmálahreyfinga til þess að taka á slíku. Þannig er þeim sem verða fyrir áreiti gert auðveldara fyrir að tilkynna áreitið og líklegra er að gerendur verði látnir sæta afleiðingum gjörða sinna.

Að taka á þessu er gríðarlega mikilvægt fyrir konur í stjórnmálum, bæði nú og þegar til framtíðar er litið, til þess að konur hafi jöfn tækifæri til stjórnmálaþátttöku og karlar.

Því munu ungliðahreyfingarnar beita sér að fullum krafti fyrir breytingum innan sinna flokka og fylgja því eftir að skýrir verkferlar séu settir fram til þess að taka á kynferðislegri áreitni og valdbeitingu innan flokkanna.

,

Stjórnmálaályktun frá landsfundi VG

Landsfundur Vinstrihreyfingarinnar – græns framboðs haldinn á Grand hótel 6.-8. október undirstrikar að komandi kosningar eru ákall um stefnubreytingu í íslensku samfélagi.

Ríkisstjórnarflokkarnir lagt fram fjárlagafrumvarp en í því má sjá stefnu fráfarandi ríkisstjórnarflokka. Áfram stóð til að þrengja verulega að heilbrigðiskerfinu, skólunum, vegakerfinu og kjörum aldraðra og öryrkja. Stefnubreytingar er þörf í öllum þessum málaflokkum.

Meiri þunga þarf að leggja í raunverulegar úrbætur í umhverfis- og náttúruverndarmálum þar sem stefnt skal að kolefnishlutleysi Íslands fyrir árið 2040. Það er bæði raunhæft og skýrt markmið sem hægt er að ná í samvinnu við sveitarfélögin og atvinnulífið.

Það þarf stefnubreytingu í kynferðisbrotamálum, en stjórnarslitin spruttu ekki síst af háværri umræðu brotaþola kynferðisbrota og aðstandenda þeirra sem kröfðust þess að uppreist æra brotamanna yrði endurskoðið. Í kjölfar þessa hljótum við að horfa til þess að styrkja stöðu brotaþola umtalsvert í samfélaginu öllu en ekki síst í réttarkerfinu. Breyting á hegningarlögum á nýliðnu þingi þar sem uppreist æra var felld úr lagatextanum er fyrsta skrefið af mörgum til úrbóta í þessum málaflokki.

Ný stefna er það sem íslenskt samfélag þarf og á skilið. Vinstri græn bjóða nú fram sterka lista með skýra stefnu í þágu fólksins í landinu.

  • Við viljum samfélag þar sem arðurinn af auðlindunum á að renna í sameiginlega sjóði og skattkerfið á að nýta til að jafna kjör.
  • Við viljum samfélag þar sem allir eiga möguleika á að njóta hæfileika sinna og taka þátt á eigin forsendum.
  • Við viljum samfélag þar sem ákvarðanir eru gagnsæjar, rekjanlegar og skiljanlegar öllum almenningi.
  • Við viljum samfélag þar sem efnahagur kemur aldrei í veg fyrir að fólk geti lært það sem hugur þess stendur til.
  • Við viljum samfélag þar sem enginn þarf að neita sér um heilbrigðisþjónustu eða lyf vegna fátæktar.
  • Við viljum samfélag þar sem húsnæði er til fyrir alla og þar sem ungar fjölskyldur sjá fjölda spennandi möguleika til að vaxa og dafna.
  • Við viljum samfélag þar sem matvælaframleiðsla er í sátt við umhverfið og vistspor er í lágmarki.
  • Við viljum samfélag þar sem búseta er um allt land og atvinnulífið einkennist af nýsköpun og fjölbreytni.
  • Við viljum samfélag þar sem stjórnvöld eru traustsins verð og standa með almenningi í landinu.
  • Við viljum réttlátt samfélag fyrir fólkið í landinu.
  • Við viljum leiða góða ríkisstjórn fyrir fólkið í landinu, fyrir náttúruna og framtíðina.

 

Ályktun VG á Akureyri um verkfall sjómanna

Eftirfarandi ályktun var samþykkt á fundi stjórnar svæðisfélags Vinstri Grænna á Akureyri og nágrenni

Stjórn svæðisfélags Vinstri Grænna á Akureyri og nágrenni lýsir yfir eindregnum stuðningi við sjómenn og fiskverkafólk. Stjórnin telur samningsleysi sjómanna til sex ára með öllu óásættanlegt og leggur áherslu á að útgerðin veiti þeim og fiskverkafólki eðlilega hlutdeild í stór batnandi afkomu veiða og vinnslu.

EVG sendir formanni og þingflokki kveðjur

Eldri vinstri græn héldu jólafund sinn í Stangarhyl  i gærkvöld, 14. desember.  Þar var samþykkt eftirfarandi kveðja til formanns og þingflokks.

“Fundurinn sendi Katrínu Jakobsdóttur sínar innilegustu kveðjur og þakkar henni og þingflokknum öllum einarða baráttu fyrir réttlátara þjóðfélagi. Hugur fundarmanna var hjá þeim.”

Og hér frásögn Guðrúnar Hallgrímsdóttur, fundarstjóra:   ” fræðamenn úr ReykjavíkurAkademíunni, undir stjórn Ragnheiðar Ólafsdóttur söngkonu,  og fræðakonu kváðu, Ragnheiður Ragnheiður söng frumsamið lag við ljóð Einars Braga.  Hermann Stefánsson og Ragnheiður kváðu og sungu um ævi Látra Bjargar og kviðlinga hennar . Gunnar Hersteinn fjallaði um gildin í samfélaginu og Guðrún Hannesdóttir las yndisleg ljóð. Gestir sungu jólalög við harmonikuundirleik Reynis og gítarspil Hermanns Stefánssonar í forföllum Björgvins.”

 

VG í Kópavogi álykta um þingrof

Aðalfundur Vinstri grænna í Kópavogi var haldinn í gærkvöldi. Ásamt venjulegum aðalfundarstörfum var eftirfarandi ályktun samþykkt einróma.

Aðalfundur VG í Kópavogi 30. mars 2016 skorar á forsætisráðherra og ríkisstjórn að rjúfa þing og boða til kosninga.
Ríkisstjórnin er rúin trausti og getur ekki setið út kjörtímabilið undir þeim skugga sem fjármálavafstur forystumanna hennar hefur myndað.

Enga herstöð

Á fjölmennum félagsfundi Vinstri grænna á Suðurnesjum voru þrjár ályktanir samþykktar

Félagsfundur Vinstri grænna á Suðurnesjum haldinn þann 11. febrúar 2016 ályktar að Ísland sé herlaust land og hafi hvorki hugmyndafræðilega né praktíska ástæðu til að leyfa herjum annara ríkja að athafna sig hér, hvorki til æfinga né eftirlits.

Félagsfundur Vinstri grænna á Suðurnesjum haldinn þann 11. febrúar 2016 ályktar að Landsbankinn verði áfram í ríkiseigu og verði breytt í samfélagsbanka

Félagsfundur Vinstri grænna á Suðurnesjum haldinn þann 11. febrúar 2016 ályktar að eldri borgarar hafi sýnt næga biðlund og krefst þess að hlutur þeirra verði réttur tafarlaust.

Ályktanir um flóttafólk

Vinstrihreyfingin – grænt framboð skoraði um helgina á stjórnvöld að veita fleira flóttafólki hæli á Íslandi og verða fyrirmynd annarra ríkja í móttöku flóttafólks.  Strax eftir helgi bárust nýjar fréttir af brottvísunum, nú tveggja samkynhneigðra karlmanna, annars sem hefur búið á Íslandi í fjögur ár og beðið úrskurðar.

Samtökin 78 fordæma í dag meðferð íslenskra yfirvalda á hinsegin flóttafólki og telja ómannúðlegt að synja hælisumsóknum eftir að umsækjendur hafi beðið eftir úrskurði í málum sínum í allt að fjögur ár. Samtökin hafa eftir lögmanni annars hælisleitendans að það stríði gegn stjórnsýslulögum.

Í ályktun flokksráðs Vinstri grænna um helgina var hvatt til að tekið yrði fast á vandanum sem reglulega birtist í afgreiðslu Útlendingastofnunar á umsóknum um hæli hér á landi. Og í ályktuninni krafðist VG jafnframt þess að stjórnvöld hæfu strax vinnu við að taka á móti fleiri flóttamönnum.

Ályktun flokksráðsfundar VG má lesa hér að neðan og ályktun Samtakanna 78 hér má lesa hér.

Opnara Ísland – áskorun til stjórnvalda

Vinstrihreyfingin – grænt framboð skorar á stjórnvöld að veita fleira flóttafólki hæli á Íslandi.
Fjöldi fólks á flótta í heiminum hefur ekki verið meiri frá því í seinni heimsstyrjöldinni. Það er skylda Íslands sem öflugs velferðarríkis að gera allt sem í valdi þjóðarinnar stendur til að bjarga mannslífum. Vinstrihreyfingin – grænt framboð fagnar komu hóps frá Sýrlandi og telur mótttöku hans upphafið að frekari aðgerðum í þágu flóttafólks.
Vegna legu Íslands og landamærastefnu er nær útilokað fyrir flóttafólk að komast til landsins af eigin rammleik, án viðkomu í öðrum löndum. Rýmka þarf reglur um hælisumsóknir hér á landi. Brottvísanir með vísan í Dyflinnareglugerðina eiga ekki að koma fyrir. Móttöku hælisleitenda þarf að styrkja verulega, með auknum fjármunum og fleiri úrræðum í þágu hælisleitenda.

Mikilvægt er að tryggja að fólk sem er nýkomið til landsins, getið tekið fullan þátt í samfélaginu, styrkja það til náms til dæmis með gjaldfrjálsri íslensku- og samfélagskennslu og hjálpa því að komast í vinnu. Taka þarf af festu á vandanum sem reglulega birtist í afgreiðslu Útlendingastofnunar. Formenn Vinstriflokka á Norðurlöndum lýstu í upphafi árs yfir vilja til Norðurlönd vinni saman í að lausn á neyð flóttamanna með sameiginlegri yfirlýsingu sem birt var í öllum löndunum. Áhrif öfga hægriflokka í norrænum ríkisstjórnum gera hins vegar flóttamönnum erfitt að nýta rétt sinn til að sækja um hæli. Vinstri græn telja að Ísland geti orðið fyrirmynd annarra ríkja í móttöku flóttafólks og krefjast þess að stjórnvöld hefji strax vinnu við að taka á móti fleiri flóttamönnum.