Ályktanir landsfundar 2017

Fjöldi ályktana var samþykktur á tíunda landsfundi VG sem fram fór í Reykjavík um liðna helgi og eru þær nú allar birtar hér. Í almennri stjórnmálaályktun kallaði fundurinn eftir stefnubreytingu í íslensku samfélagi og áréttaði að fráfarandi ríkisstjórnarflokkar setti fram sína stefnu í fjárlagafrumvarpinu sem lagt var fyrir þingið áður en stjórnin sprakk. „Áfram stóð til að þrengja verulega að heilbrigðiskerfinu, skólunum, vegakerfinu og kjörum aldraðra og öryrkja. Stefnubreytingar er þörf í öllum þessum málaflokkum,“ segir í ályktuninni.

Tólf ályktanir voru samþykktar um umhverfismál og einnig var ályktað um jafnréttismál, alþjóða- og mannréttindamál, velferðar- og heilbrigðismál, mennta- og menningarmál, samgöngu- og sveitarstjórnarmál, atvinnumál, vinnumarkaðs- og verkalýðsmál, húsnæðismál, lækkun kosningaaldurs og jöfn tækifæri og lífsgæði fyrir ungt fólk. Þá sendi fundurinn ICAN, samtök sem berjast gegn kjarnorkuvopnum, hamingjuóskir með friðarverðlaun Nóbels.

Smelltu hér til að lesa allar samþykktar ályktanir.

Smelltu hér til að lesa nýjar stefnur sem voru samþykktar á fundinum.

Smelltu hér til að lesa kosningaáherslur VG 2017.

  Nýkjörinn varaformaður VG í baráttusæti í NA-kjördæmi

             

 

Framboðslisti Vinstri grænna í NA-kjördæmi var samþykktur einróma á aukafundi kjördæmisráðs á Akureyri í kvöld.

 

 

 

  1. Steingrímur Jóhann Sigfússon, alþingismaður, Gunnarsstöðum.

 

  1. Bjarkey Olsen Gunnarsdóttir, alþingismaður, Ólafsfirði.

 

  1. Ingibjörg Þórðardóttir, framhaldsskólakennari, Neskaupstað.

 

  1. Edward H. Huijbens, varaformaður Vinstri grænna, prófessor, Akureyri.

 

  1. Óli Halldórsson, forstöðumaður og sveitarstjórnarfulltrúi, Húsavík.

 

  1. Berglind Häsler, bóndi og matvælaframleiðandi, Djúpavogshreppi.

 

  1. Sóley Björk Stefánsdóttir, bæjarfulltrúi, Akureyri.

 

  1. Sindri Geir Óskarsson, guðfræðingur, Dæli.

 

  1. Þuríður Skarphéðinsdóttir, hjúkrunarfræðingur, Egilsstöðum.

 

  1. Hjördís Helga Seljan, grunnskólakennari, Reyðarfirði.

 

  1. Aðalbjörn Jóhannsson, nemi, Húsavík.

 

  1. Helgi Hlynur Ásgrímsson, sjómaður, Borgarfirði eystri.

 

  1. Jóna Björg Hlöðversdóttir, bóndi og varaformaður Ungra bænda,        Björgum.

 

  1. Tryggvi Kristbjörn Guðmundsson, smiður, Dalvík.

 

  1. Sif Jóhannesdóttir, forstöðumaður Menningarmiðstöðvar Þingeyinga og     sveitarstjórnarfulltrúi, Húsavík.

 

  1. Björn Halldórsson, bóndi, Akri, Vopnafirði.

 

  1. Þórunn Hrund Óladóttir, kennari, Seyðisfirði.

 

  1. Hrafnkell Freyr Lárusson, doktorsnemi, Breiðdalsvík.

 

  1. Þorsteinn V. Gunnarsson, sérfræðingur hjá Rannís og fyrrv. rektor, Akureyri.

 

  1. Kristín Sigfúsdóttir, fyrrv. framhaldsskólakennari og bæjarfulltrúi, Akureyri.

Gerum betur – kosningaáherslur Vinstri grænna

„Við tölum fyrir samfélagi fyrir alla og hluti af því er að skattkerfið sé réttlátt, að almenningur í þessu landi geti lifað góðu lífi á sanngjörnum launum sem duga til að ná endum saman og innviðirnir standi undir nafni,“ sagði Katrín Jakobsdóttir formaður Vinstri grænna þegar hún kynnti kosningaáherslur hreyfingarinnar á komandi kosningum á landsfundi í dag. „Í velferðinni sem við eigum saman felast verðmætin fyrir fjölskyldunar í landinu. Það eru verðmætin að geta gengið að heilbrigðisþjónustu og menntun – að geta treyst því að samfélagið grípi fólk. Þetta verður stóra málið ásamt metnaðarfullum markmiðum í umhverfismálum,“ sagði Katrín. Kosningaáherslurnar má finna hér í heild sinni.

Landsfundi Vinstri grænna var slitið klukkan 16 í dag.

,

Stjórnmálaályktun frá landsfundi VG

Landsfundur Vinstrihreyfingarinnar – græns framboðs haldinn á Grand hótel 6.-8. október undirstrikar að komandi kosningar eru ákall um stefnubreytingu í íslensku samfélagi.

Ríkisstjórnarflokkarnir lagt fram fjárlagafrumvarp en í því má sjá stefnu fráfarandi ríkisstjórnarflokka. Áfram stóð til að þrengja verulega að heilbrigðiskerfinu, skólunum, vegakerfinu og kjörum aldraðra og öryrkja. Stefnubreytingar er þörf í öllum þessum málaflokkum.

Meiri þunga þarf að leggja í raunverulegar úrbætur í umhverfis- og náttúruverndarmálum þar sem stefnt skal að kolefnishlutleysi Íslands fyrir árið 2040. Það er bæði raunhæft og skýrt markmið sem hægt er að ná í samvinnu við sveitarfélögin og atvinnulífið.

Það þarf stefnubreytingu í kynferðisbrotamálum, en stjórnarslitin spruttu ekki síst af háværri umræðu brotaþola kynferðisbrota og aðstandenda þeirra sem kröfðust þess að uppreist æra brotamanna yrði endurskoðið. Í kjölfar þessa hljótum við að horfa til þess að styrkja stöðu brotaþola umtalsvert í samfélaginu öllu en ekki síst í réttarkerfinu. Breyting á hegningarlögum á nýliðnu þingi þar sem uppreist æra var felld úr lagatextanum er fyrsta skrefið af mörgum til úrbóta í þessum málaflokki.

Ný stefna er það sem íslenskt samfélag þarf og á skilið. Vinstri græn bjóða nú fram sterka lista með skýra stefnu í þágu fólksins í landinu.

  • Við viljum samfélag þar sem arðurinn af auðlindunum á að renna í sameiginlega sjóði og skattkerfið á að nýta til að jafna kjör.
  • Við viljum samfélag þar sem allir eiga möguleika á að njóta hæfileika sinna og taka þátt á eigin forsendum.
  • Við viljum samfélag þar sem ákvarðanir eru gagnsæjar, rekjanlegar og skiljanlegar öllum almenningi.
  • Við viljum samfélag þar sem efnahagur kemur aldrei í veg fyrir að fólk geti lært það sem hugur þess stendur til.
  • Við viljum samfélag þar sem enginn þarf að neita sér um heilbrigðisþjónustu eða lyf vegna fátæktar.
  • Við viljum samfélag þar sem húsnæði er til fyrir alla og þar sem ungar fjölskyldur sjá fjölda spennandi möguleika til að vaxa og dafna.
  • Við viljum samfélag þar sem matvælaframleiðsla er í sátt við umhverfið og vistspor er í lágmarki.
  • Við viljum samfélag þar sem búseta er um allt land og atvinnulífið einkennist af nýsköpun og fjölbreytni.
  • Við viljum samfélag þar sem stjórnvöld eru traustsins verð og standa með almenningi í landinu.
  • Við viljum réttlátt samfélag fyrir fólkið í landinu.
  • Við viljum leiða góða ríkisstjórn fyrir fólkið í landinu, fyrir náttúruna og framtíðina.

 

Nýjar stefnur í sex málaflokkum

Vinstri græn samþykktu nýja stefnu í sex málaflokkum á landsfundi sínum um helgina. Nú standa yfir umræður um ályktanir sem verða birtar hér á síðunni strax eftir helgina. Á landsfundinum hafa Vinstri græn áréttað stefnu sína um að byggja upp heilbrigt atvinnulíf og öflugt velferðar-, heilbrigðis- og menntakerfi. Sjálfbærni og félagslegt réttlæti eru meginstef í allri stefnumótun VG.

Smelltu hér til að lesa nýja stefnu í atvinnumálum, efnahagsmálum, neytendamálum orkumálum, sjávarútvegsmálum og vinnumarkaðs- og verkalýðsmálum.

Smelltu hér til að lesa eldri stefnur VG.

Síðar í dag verða kosningaáherslur VG 2017 birtar hér á síðunni.

Kveðja á landsfund frá Birni Val Gíslasyni

Kveðja frá Birni Val Gíslasyni.

Ágætu landsfundargestir.

Ég þakka formanni og fráfarandi stjórn samstarfið á liðnum árum og óska jafnframt nýrri stjórn og framvarðasveit Vinstri grænna alls hins besta í sínum störfum.

Ég vænti þess að Vinstri græn fái góða kosningu síðar í mánuðinum. Það mun hinsvegar ekki gerast af sjálfu sér. Stjórnmál mega aldrei verða að notalegu hjali milli pólitískra andstæðinga, heldur verða alltaf að eiga sér stað átök um stefnur og pólitískar áherslur. Því hvet ég ykkur öll, sem og félaga okkar um land allt til að vera föst fyrir og órög að efna til pólitískra átaka um stefnumál Vinstri grænna á þeim fáu dögum sem eftir eru til kosninga og skerpa þannig á valkostunum sem kjósendur standa frammi fyrir.

Þjóðin á það skilið að Vinstrihreyfingin – grænt framboð verði í forsæti nýrrar ríkisstjórnar að loknum kosningum.

Ég bið ekki um meira – í bili.

Bestu kveðjur til ykkar allra.

Niður með íhaldið.

Björn Valur Gíslason

 

 

 

 

Edward Huijbens kjörinn varaformaður

„Það mikilvægasta sem stjórnmálamaðurinn býr að er traust, og þið hafið sýnt mér mikið traust hér í dag kæru félagar og það umboð mun ég fara vel með,“ sagði Edward Hákon Huijbens nýkjörinn varformaður Vinstri grænna í þakkarræðu sinni á landsfundi í dag. „Ég er kominn til þess að vinna fyrir hreyfinguna, málstaðinn og framtíðina.“

Edward, sem er 41 árs prófessor við Háskólann á Akureyri, hlaut 148 atkvæði en Óli Halldórsson 70 og fimm atkvæði voru auð. Katrín Jakobsdóttir var sjálfkjörin formaður Vinstri grænna rétt eins og Elín Oddný Sigurðardóttir í stöðu ritara og Una Hildardóttir í stöðu gjaldkera.

Einnig voru kjörnir sjö meðstjórnendur í stjórn Vinstri grænna og fjórir til vara.  Þau Ingibjörg Þórðardóttir (200 atkvæði), Óli Halldórsson (199), Rúnar Gíslason (161), Daníel E Arnarson (158), Álfheiður Ingadóttir (156), Anna Guðrún Þórhallsdóttir (135) og Margrét Pétursdóttir (129) voru kjörnir meðstjórnendur. Þeir Bjarni Jónsson (103), Einar Bergmundur Þorgerðarson Bóasarson (92), Ingvar Arnarson (90) og Ragnar Karl Jóhannsson (63) og voru kjörnir varamenn.

Ný stjórn Vinstri grænna er því eftirfarandi:

  • Katrín Jakobsdóttir formaður.
  • Edward Hákon Huijbens varaformaður.
  • Elín Oddný Sigurðardóttir ritari.
  • Una Hildardóttir gjaldkeri.
  • Ingibjörg Þórðardóttir.
  • Óli Halldórsson.
  • Rúnar Gíslason.
  • Daníel E Arnarson.
  • Álfheiður Ingadóttir.
  • Anna Guðrún Þórhallsdóttir.
  • Margrét Pétursdóttir.

Varmenn í stjórn:

  • Bjarni Jónsson.
  • Einar Bergmundur Þorgerðarson Bóasarson.
  • Ingvar Arnarson.
  • Ragnar Karl Jóhannsson.

Heimur án kjarnorkuvopna: ræða Fabians Hamilton

Hinn sögulegi samningur um bann við kjarnorkuvopnum, sem var samþykktur á vettvangi Sameinuðu þjóðanna sl. sumar, mun þegar fram líða stundir breyta því hvaða augum heimurinn lítur kjarnorkuvopn. Þetta sagði Fabian Hamilton, skuggamálaráðherra í friðar- og afvopnunarmálum frá Bretlandi, á landsfundi VG í dag. Hamilton bar fundinum kveðju frá Jeremy Corbyn, formanni Verkamannaflokksins, en Corbyn og Hamilton hafa verið virkir í friðarbaráttunni í Bretlandi um áratuga skeið.

Embætti skuggaráðherra í friðar- og afvopnunarmálum var komið á fót af Corbyn, formanni Verkamannaflokksins, en sambærilegt embætti er ekki innan bresku ríkisstjórnarinnar. Hamilton er falið að að leita leiða til að draga úr ofbeldi, stríðum og átökum á heimsvísu og tala fyrir ábyrgri utanríkisstefnu Breta í þessum efnum, en Bretland er eitt af stærstu herveldum heims.

Hamilton áréttaði á landsfundi VG í dag að mannkynið yrði að stöðva sjálfstortímingarhvötina sem fælist í því að þróa og viðhalda kjarnorkuvopnum. Skref hafi verið tekin fram á við í banni á kjarnorkuvopnum og efnavopnum og að heimur án þeirra væri vel mögulegur.

Óttastjórnmál víki: erindi Prögnu Patel á landsfundi VG

„Fasismi sem er byggður á þjóðernishyggju og trúarbrögðum er að festa rætur að nýju víða um heim. Þess sér ekki  eingöngu merki í Bandaríkjunum eða Póllandi eða Ungverjalandi, heldur líka í Indlandi, Tyrklandi, Myanmar og öðrum svæðum heimsins. Hann fer hönd í hönd við stjórnmál niðurskurðar og nýfrjálshyggju, sem leiðir til banvænnar blöndu kynþátta- og kynjahyggjuofbeldis, þar sem óumburðarlyndi, hatur, ójöfnuður og þröngsýni fá að þrífast.“

Þetta sagði Pragna Patel, forstöðukona grasrótarsamtakanna Southall Black Sisters í Lundúnum, á landsfundi Vinstri grænna á Grand hóteli í morgun. Patel varaði við uppsveiflu bókstafstrúar – þar sem trú er misnotuð í pólitískum tilgangi – og tilhneigingunni til að rugla saman framsækinni fjölmenningarstefnu við afturhaldssama trúarbragðastefnu, þar sem réttindi kvenna ættu undir högg að sækja.

Patel sagði Brexit hafa ýtt undir rasisma og innflytjendaandúð, sem aftur hafi ýtt undir hatursglæpi. Innflytjendakonur séu í sérstaklega viðkvæmri stöðu og geti ekki alltaf leitað til yfirvalda eftir þjónustu og aðstoð, þar á meðal til að flýja ofbeldi.

„Rasísk innflytjendaandúð hefur ekki aðeins verið normaliseruð meðal almennings, heldur líka innan samfélaga innflytjenda, þar sem mismunandi hópar taka stöðu hver gegn öðrum.“

Patel fagnaði góðu gengi VG í skoðanakönnunum. Fengi VG brautargengi til að leiða ríkisstjórn að loknum kosningum hefði það ekki eingöngu áhrif á Íslandi, heldur víðar, þar sem óttastjórnmál vikju fyrir stjórnmálum vonar.