s_1-ari-trausti-gudmundsson_crop-1

Hraðari breytingar – takk

Margþætt orkuskipti

Við verðum að ræða oftar og dýpra um loftslagsmálin, alls staðar í samfélaginu og á Alþingi, á því liggur enginn vafi. Orkuskipti í geira einkabílsins eru hafin og þau eru fjölþætt. Metan, íblöndun alkóhóls og lífdísill og fleira, þetta sést allt hér, en rafvæðingin er líka í verulegri uppsveiflu og í árslok 2016 voru rafbílar liðlegar eitt þúsund. Það munar mikið um niðurfellingu gjalda í kaupverði bíla. Áfram verður að hafa þann háttinn á, líka þarf að sýna fram á að vistspor og losunarmagn bílanna frá smíði til förgunar sé léttara en vistspor og losunarmagn sambærilegra hefðbundinna bíla. Ella er til lítils unnið og erfitt að sannfæra kaupendurna.

Innlent eldsneyti skiptir líka máli. Því er gert of lágt undir höfði í áætlun um orkuskipti sem hefur verið lögð fram á Alþingi. Ég stefni að sérstökum umræðum um þessi orkuskipti og innlent eldsneyti við iðnaðarráðherra, eins fljóttog auðið er. Í þessum efnum skiptir t.d. miklu máli að unnt er að framleiða mikið verulegt magn metanóls á sem getur nýst ýmist sem hófleg íblöndum í jarðefnaeldsneyti eða frá 50% til 100% á (bruna)bílvélar sem eru lítið breyttar frá þeim venjulegu.

 

Hvað með rafbíla?

Uppsetning hleðslustöðva með ókeypis rafmagn hefur gengið of hægt og of litlu opinberu fé hefur verið varið til þeirra. Nú eru til ráðstöfunar aðeins 67 milljón kr. af opinberu fé á ári í þrjú ár. Brátt fara svo orkusölur að hyggja að beinni sölu raforkunnar á hleðslustöðvum og ríkisvaldið að hyggja að tekjumissinum þegar notkun á olíu og bensíni minnkar. Verður kílómetragjald lagt á rafbíla? Er rétt að stöðva sölu nýrra bíla með hefðbundnum orkugjöfum innan tiltekinna ára eins og heyrst hefur?

 

Hik er ekki í boði

Ég vakti athygli á öllu þessu í umræðum á Alþingi vegna þess að okkur er lofuð aðgerðaáætlun í loftslagsmálum og klukkan tikkar óvenju hratt í mannheimum frammi fyrir loftslagsbreytingum og afleiðingum þeirra. Að nógu er að hyggja í samgönguþætti þeirrar áætlunar, bæði tekju- og gjaldamegin. Þá er vert að muna að hagnaður í beinhörðum peningum er ekki alltaf eini rétti mælikvarði árangurs.

Og meðan ég man: Kolefnishlutlaust Ísland fyrir 2040 á að vera skýrt markmið samanber stefnumið okkar Vinstri grænna.

 

Ari Trausti er 6. þingmaður Suðurkjördæmis fyrir VG