Í þágu grísks almennings eða auðvaldsins?

Virðulegi forseti,

Þau okkar sem upplifðum hrunið hér haustið 2008 getum varla annað en leitt hugann að Grikkjum þessa dagana. Eftir að hafa verið í stöðugri krísustjórnun á vegum Evrópusambandsins og Alþjóðagjaldeyrissjóðsins síðustu fimm árin virðist landið komið á ákveðna endastöð.

Á sunnudaginn kýs gríska þjóðin um drög að samningi sem myndi krefjast enn frekari niðurskurðar á velferðarkerfi. Velferðarkerfi sem hefur stöðugt verið gengið á. Velferðarkerfi sem hangir rétt á horriminni.

Hér er meira í húfi en fjármálakerfið. Er lýðræðiskerfið komið þangað, að það snúist bara um lögmál hagkerfisins? Að fjármálaráðherra Þýskalands ráði meiru um örlög grískra spítala og grískra lífeyrisþega en grísk stjórnvöld?

Í samskiptum sínum við Grikkland undanfarið hafa Evrópusambandið og Alþjóðagjaldeyrissjóðurinn sýnt auðvaldinu allt of mikla þjónkun á kostnað almennings í Grikklandi. Það kom til dæmis skýrt í ljós þegar ríkisstjórn Alexis Tsipras lagði til að verða við niðurskurðarkröfu þeirra með einföldum hætti; að skera niður í hermálum. Atlantshafsbandalagið áætlar að heil 2,4% af þjóðarframleiðslu Grikkja renni til hermála á yfirstandandi ári, þannig að þarna er greinilega mikið sóknarfæri í að draga úr ríkisútgjöldum.

En þá háttar svo til að 15% af útflutningi Þjóðverja á hergögnum rennur til Grikkja og 10% hergagnaútflutnings Frakka. Tillögum ríkisstjórnar Grikklands um að mæta niðurskurðarkröfunni með niðurskurði í hermálum var því hafnað af viðsemjendum. En hvort er það í þágu grísks almennings eða auðvaldsins í kjarnaríkjum Evrópusambandsins?

Andrés Ingi Jónsson, varaþingmaður VG í störfum þingsins 30. júní 2015