Það á að vera gott að búa í Hafnarfirði

Undanfarið hefur mátt lesa um trausta fjárhagsstöðu bæjarins, viðsnúning í rekstri og því er haldið sérstaklega á lofti að álögur bæjarins hafi verið lækkaðar. Það sem hér hefur verið nefnt tengist fyrst og fremst hagvexti, sem einskorðast ekki við Hafnarfjörð, og allir en ekki aðeins útvaldir eiga að geta notið.

En hvað er það sem skiptir máli fyrir íbúa Hafnarfjarðar?

Skiptir það  t.d. meira máli að fá nokkur hundruð króna lækkun á álögur á hvern íbúa en að hér sé veitt sjálfsögð og lögbundin þjónusta?

Skiptir það almennt máli að hér búa Hafnfirðingar sem eru á biðlistum eftir félagslegu húsnæði  eða skiptir það bara máli fyrir þá sem um ræðir?

Skiptir það máli að barnafólk sem flytur hingað úr öðrum sveitafélögum kemur börnunum sínum seinna inn á leikskóla en ef það hefði ekki flutt og að þess séu dæmi að foreldrar þurfi að reiða sig á barnapössun hjá skyldmennum til að brúa bilið á milli fæðingarorlofs og þess að fá leikskólapláss?

Skiptir það okkur máli að í Hafnarfirði er skortur á úrræðum fyrir eldri borgara sem þurfa á nauðsynlegri aðstoð að halda?

VG vill að lögð verði áhersla á að eyða biðlistum eftir sjálfsagðri þjónustu því annað er brot á jafnrétti og lögbundinni skyldu sveitarfélaga.

Hafnarfjörður hefur allt sem þarf til að íbúum geti liðið vel. Sem dæmi má nefna að hér eru góðir leik- og grunnskólar og tveir öflugir skólar fyrir nemendur á framhaldsskólaaldri.

Hér er iðandi menning, blómlegt íþrótta- og tómstundastarf  og nánast hægt að sækja allar nauðsynjar og  þjónustu innan bæjarmarka.

Það á að vera gott að búa í Hafnarfirði fyrir okkur öll  en það verður ekki fyrr en við leggjum áherslu á að sinna betur innviðum bæjarins. Þá fyrst getum við sagt að bærinn sé í allra fremstu röð sveitafélaga og að hér sé gott að búa.

Gerum betur – kjósum VG

Kristrúnu Birgisdóttir skipar þriðja sæti á lista VG í Hafnarfirði