Þingið álykti um kaup á erlendum skattagögnum

Svandís Svavarsdóttir

Katrín Jakobsdóttir, Svandís Svavarsdóttir og Ögmundur Jónasson þingmenn VG hyggjast leggja fram þingsályktunartillögu um heimild til skattrannsóknarstjóra til kaupa á erlendum gögnum um skattaundanskot íslenskra borgara. Lagt er til að skattrannsóknarstjóri leggi svo fljótt sem auðið er mat á þau skattgögn sem embættinu hafa verið boðin til kaups og annist kaup á þeim telji skattrannsóknarstjóri það rétt. Einnig er lagt til að Alþingi samþykki að tryggja fjárheimildir til kaupanna.

Hér er um að ræða réttlætismál sem varðar hagsmuni ríkissjóðs og þar með allra landsmanna. Haldið er til haga því meginsjónarmiði að álagðir skattar tilheyri samfélaginu með réttu en skattsvik ávallt ranglát. Skattsvik sem framin eru með því að fela fé í svokölluðum skattaskjólum eru alþjóðlegt vandamál sem barist er gegn á mörgum sviðum. Þingmálið er liður í þeirri baráttu enda ljóst að þessi brotastarfsemi hefur grafið um sig hérlendis eins og svo víða annars staðar og mikilvægt að brugðist verði við af fullri einurð. Í framhaldi af því er nauðsynlegt að setja framtíðarraman um fyrirkomulag þessara mála.