Þetta er meðal þess sem fram kemur í nýlegri skýrslu Transgender Europe (TGEU) sem eru regnhlífarsamtök um 200 félaga sem berjast fyrir réttindum trans fólks í 48 ríkjum í Evrópu og Mið-Asíu.

Í skýrslunni kemur fram að kynsegin fólk sé sá hópur innan trans samfélagsins sem hafi vaxið mest en víðast hvar hafi þessi hópur ekki möguleika á opinberri skráningu í samræmi við kynvitund sína.

TGEU gefur einnig árlega út kort þar sem réttindi trans fólks í Evrópu og Mið-Asíu eru borin saman milli landa. Ísland stendur almennt vel í samanburði á lagalegum réttindum trans fólks. Þannig er Ísland eitt af fáum löndum þar sem ekki eru sett aldursskilyrði fyrir breyttri kynskráningu og ásamt Möltu eina landið sem tryggir í lögum foreldrarétt kynsegin einstaklinga.

The post Ísland í fararbroddi varðandi rétt einstaklinga til að breyta opinberri kynskráningu appeared first on Vinstri græn.

Leiðandi sveitarfélög

Vinstri græn í Kópavogi vilja að sveitarfélögin verði leiðandi í atvinnuþátttöku fólks með skerta vinnugetu. Það er ennþá þannig að stór hluti öryrkja fær ekki tækifæri til að fara á vinnumarkaðinn. Hér á landi eru flest störf 100% stöður en margir einstaklingar geta ekki unnið fulla vinnu. Þessir einstaklingar vilja ekkert síður leggja sitt af mörkum.

Sveitarfélögin geta boðið upp á hlutastörf og sveigjanleg störf, jafnt á við 100% störf. Það sem til þarf er breyting á þeirri hugsun Íslendinga að vinna sé eingöngu vinna ef um 100% vinnu er að ræða. Stór hluti öryrkja vill og getur unnið en þeim er ekki mætt þar sem þau eru. Þar missir atvinnulífið og samfélagið allt, af miklum mannauði og góðum vinnufélögum.

Sveitarfélög ættu að geta boðið upp á margskonar hlutastörf sem henta þessum fjölbreytta hópi fólks, til að mynda í skólum, leikskólum, hjúkrunarheimilum, eða á öðrum starfsstöðvum. Gangi sveitarfélög á undan með góðu fordæmi verður vonandi stutt í að almenni vinnumarkaðurinn sjái hag sinn í að vera með fleiri og fjölbreyttari störf fyrir þennan fjölbreytta hóp einstaklinga.

Kjarabætur stéttarfélaganna

Það er líka vert er að hafa í huga þær kjarabætur sem fólk á vinnumarkaði vinnur sér inn hjá sínum stéttarfélögunum. Öryrkjar hafa engin stéttarfélög til að leita til, eins og þau okkar sem erum á vinnumarkaði. Þar af leiðandi geta öryrkjar ekki leigt sér sumarbústaði né sótt endurgreiðslur fyrir ýmsum ívilnunum eins og að sækja námskeið eða ráðstefnur til að auka við þekkingu sína eða stunda nám, og verða því af miklu.

Það mætti líka skoða að stofna félag fyrir þau sem eru á örorku en geta ekki unnið. Þar gætu þau sótt um ljúfa viku í sumarbústað eða sóst eftir endurgreiðslu fyrir námi, endurmenntun eða ráðstefnum til að bæta við sína þekkingu.

Frekari breytingar þarf til – höldum dampi

Núverandi kerfi gerir öryrkjum erfitt fyrir að stunda vinnu. Bætur þeirra skerðast 65 aura á móti krónu. Þar af leiðandi getur það komið verr út fyrir einstaklinga á örorkubótum að reyna að vinna með. Fari einstaklingur yfir ákveðin mörk getur hann þurft að endurgreiða ansi háa fjárhæð til baka sem getur leitt til mikillar fátæktar sem getur orðið erfitt að komast upp úr.

Við vitum að margt er í bígerð í félags- og vinnumarkaðsráðuneytinu í málefnum öryrkja og að nú þegar hefur mikið áunnist. Ráðherra er byrjaður að breyta og bæta flókið og margslungið örorkukerfið. Börn örorkulífeyrisþega geta nú búið heima og verið í námi til 26 ára aldurs án þess að skerða bætur foreldris/foreldra án kröfunnar um 100% nám. Ráðherra hefur brugðist við dómi Hæstaréttar um greiðslur til örorkulífeyrisþega byggða á búsetu hér á landi með reglugerðabreytingum. Vinnan við leiðréttingu til þeirra sem fengu lægri greiðslur byggðar á lengd búsetu á Íslandi er einnig hafin.

Við viljum sjá frekari breytingar, er varða atvinnumöguleika öryrkja, koma í gagnið sem allra fyrst. Einföldum kerfið svo öryrkjar eigi auðveldara með að stunda vinnu, eignast vinnufélaga, nýja vini til frambúðar, og fái að tilheyra að vild.

Við skorum á félagsmálayfirvöld, í samvinnu við ráðuneyti félags og vinnumarkaðs, að beita sér sérstaklega á þessum vettvangi. Lagabreytingar þurfa að líta dagsins ljós sem fyrst, en vilji sveitarfélaganna skiptir líka mjög miklu. Við eigum öll að fá tækifæri til að vinna eftir getu og sveitarfélögin eiga að sækjast eftir vinnuframlagi þeirra sem hafa skerta starfsgetu.

Ásta Kristín Guðmundsdóttir, félagsráðgjafi, formaður VG í Kópavogi, skipar 2. sæti á lista VG í Kópavogi.

Anna Sigríður Hafliðadóttir, markaðssérfræðingur, skipar 3. sæti á lista VG í Kópavogi.

The post Manstu fyrsta starfið? appeared first on Vinstri græn.

Það gefur auga leið að uppbygging meginfluggáttarinnar til landsins, á Miðnesheiði, mun taka mið bæði að flugstefnunni og meginstefnu stjórnvalda í ferðaþjónustu. ISAVIA er ekki eyland í samfélaginu og verið er að vinna ríkifyrirtækinu eigendastefnu. Þar hlýtur að koma fram að ferðaþjónusta, sem hefur sín þolmörk í ljósi sjálfbærni, lýtur stýrðri þóun sem markar uppbyggingunni ramma. Áætlanir að uppbyggingu Leifsstöðvar eiga að taka mið af honum. Það verður til þess að fjölda ferðamanna inn til Íslands og millilendingafarþega verða takmörk sett. Þar með er flugþjónusta á Íslandi takmörkuð auðlind og afmörkuð stærð, í bland við aðrar atvinnugreinar, á hverju tilteknu tímabili.

Mikilvægt er að minna á að stefna ríkisstjórnarinnar hefur líka komið fram, í orðum Sigurðar Inga Jóhannssonar ráðherra og samgönguáætluninni, að hluta af hagnaði eða gjaldtöku ISAVIA skal nota í að bæta varaflugvelli millilandaflugsins. Það hefur aftur áhrif á aðra flugvelli með því að annað fjármagn fæst þá til að bæta ástand og rekstur þeirra. Þetta er væntanlega líka hluti flugstefnu Íslands. Þar inni eru líka tilteknir sjúkraflugvellir.

Þróun flugvéla og leiðsagnartækja er hröð og margt vinnst þar í þágu umhverfis- og  loftslagsmála með hverju ári. Það er engu að síður einföldun að klifa á rafvæðingu flugs eins og hún sé meginleið til að minnka losun frá loftförum. Um alllanga hríð munu rafflugvélar verða algengar sem 2 til 8 eða 10 manna loftför. Stærri farþegavélar nýta margar „grænt eldsneyti“ svo sem vetni, alkólhól og lífdísil. Öflugar eða langfleygar vélar á norrænum veðurslóðum verða þeirrar gerðar um hríð. Flugstefnan hlýtur að taka mið af þeim raunveruleika. Ítreka verður  að hún vinnst í fáeinum stórum skrefum með góðu samráði fagaðila, hagaðila, stjórnvalda, þingflokka og almennings. Tekur mið af raunveruleikanum.

Það á líka við um nauðsyn á að tengjast gervihnattaleiðsögukerfi sem eykur enn á öryggi í flugi.

Ari Trausti Guðmundsson, alþingismaður

The post Flugstefna appeared first on Vinstri græn.

Þrenn jarðfræðileg rök mæla gegn jarðgangagerð milli lands og Eyja. Fyrst bera að telja lítt hörnuðu setbergslögin sem liggja ofan á gömlum blágrýtisberggrunni á öllu botnsvæði eyjanna. Þau eru 200 til 700 m þykk, úr jökulurð og sjávarsetlögum. Slíkur stafli er með öllu óhentugur fyrir jarðgöng. Við bætist að Eyjarnar sem stakar goseiningar eru að mestu úr móbergi (harnaðri gjósku). Heimaey er að hluta mynduð úr hrauni sem tengdi saman eldri móbergseiningar. Jarðgangagerð í móbergi er ekki stunduð og mestar líkur á að það sé of erfitt viðureignar, einkum þó neðansjávar. Loks skal nefnt að eldstöðvakerfi Eyja er með virkum sprungureinum. Þar verða hreyfingar á brotalínum eins og skjálftagögn staðfesta. Áhætta við gerð og rekstur jarðganga í virku eldstöðvakerfi er of mikil. Samsett göng á sjávarbotni í grunnu og oft ólmu úthafi koma ekki til greina.

Endurbætur á Landeyjahöfn og viðhald hennar er meginkosturinn sem blasir við okkur. Þess vegna varð til samstaða allar þingmanna kjödæmisins um óháða úttekt á höfninni og tillögur um úrbætur. Þær hljóta að vera mögulegar að tilteknu marki. Hvernig sem fer má gera ráð fyrir verulegum kostnaði til langrar framtíðar við þessa höfn móti opnu hafi á flatri sandströnd með miklum setflutningum í sjó. Því verður íslenskt samfélag að una.

Flug milli lands og Eyja verður að vera nothæft sem hluti almenningssamgangna, með eða án niðurgreiðslna. Nú verður reynslu safnað af 50% niðurgreiðslu tiltekins fjölda flugferða heimamanna (skoska leiðin) og áfram bundnar vonir við öflugar flugsamgöngur við Eyjar. Við bætist svo tilraunarverkefni með sjúkraþyrlu á Suðurlandi.

Það er og verður áskorun að halda uppi ásættanlegum samgöngum milli Eyja og lands. Góð samstaða í öllum geirum samfélagsins er þar ein helsta forsenda fyrir árangri.

Ari Trausti Guðmundsson, alþingismaður.

The post Vestmannaeyjar: Samgöngur enn og aftur appeared first on Vinstri græn.

Krefjandi, viðburðaríkt, árangursríkt. Öll þessi orð koma mér í hug þegar árið 2019 er rifjað upp. Í apríl voru lífskjarasamningarnir undirritaðir á almennum vinnumarkaði en þeir mörkuðu ákveðin tímamót. Þeir eru umbótasamningar sem fólu annars vegar í sér nýja nálgun aðila vinnumarkaðarins á kjarasamninga og hins vegar ríkari aðkomu stjórnvalda en áður hefur tíðkast.

Ríkisstjórnin gaf út veigamikla yfirlýsingu um aðgerðir og umbætur til að bæta lífskjör í landinu og studdi þannig við samningana. Í lok árs voru samþykkt ýmis lög á Alþingi á grundvelli yfirlýsingarinnar. Samþykkt var nýtt þriggja þrepa skattkerfi sem er réttlátara og skilar skattalækkun sem verður mest hjá tekjulægri hópum. Samhliða því hækka barnabætur og hafa þær þá hækkað um 27% frá árinu 2018. Alþingi samþykkti frumvarp um uppbyggingu almennra íbúða og á næsta ári styrkja stjórnvöld byggingu tvöfalt fleiri íbúða en áætlað var. Þá verður fæðingarorlof lengt í heilt ár, sem er risastórt framfaramál fyrir allt barnafólk á Íslandi. Frekari aðgerðir eru framundan, þ. á m. fyrstu skrefin til afnáms verðtryggingar og aðgerðir gegn félagslegum undirboðum og brotastarfsemi á vinnumarkaði sem er samfélagsleg meinsemd sem ekki getur liðist.

Með lífskjarasamningunum er stigið mikilvægt skref til að peningastefna, ríkisfjármálastefna og vinnumarkaðsstefna vinni saman en frá undirritun hafa stýrivextir Seðlabankans lækkað töluvert og eru nú 3%.

Samfélagsleg framfaramál

Komandi ár verður krefjandi á sviði efnahagsmála þó að góður árangur hafi náðst. Framundan er verk að vinna við að auka opinbera fjárfestingu og blása þannig byr í seglin án þess að missa tökin á hagstjórninni. Þá þurfa samningar við opinbera starfsmenn að takast. Undanfarin misseri hafa minnt á að hagstjórn snýst um að vera stöðugt á vaktinni og tryggja þetta viðkvæma samspil með stóru myndina í huga: Að efnahagslegur stöðugleiki þarf að fara saman við velsæld almennings og sjálfbæra nýtingu auðlinda án þess að gengið sé á umhverfisleg gæði til framtíðar.

Samfélagsleg framfaramál hafa þó ekki verið bundin við úrlausnarefni á vinnumarkaði. Þannig hafa verið stigin stór skref á undanförnum tveimur árum til að draga úr kostnaði sjúklinga við heilbrigðisþjónustu en þar hefur sérstaklega verið forgangsraðað öryrkjum og öldruðum, fyrst hvað varðar tannlæknakostnað, og í kjölfarið komugjöld á heilsugæslustöðvar. Áform eru um að verja 3,5 milljörðum á komandi árum til að draga enn frekar úr sjúkrakostnaði fólks.  Um leið hefur verið stóraukin þjónusta á sviði geðheilbrigðis innan heilsugæslunnar auk ýmissa annarra umbótamála á þessu sviði.

Í sumar samþykkti Alþingi að draga úr skerðingum á greiðslur til örorkulífeyrisþega sem hefur verið baráttumál þeirra til margra ára. Það er fyrsta skrefið sem stigið hefur verið í þeim efnum í áratug.

Réttindabarátta skilar árangri

Þau réttindi sem við teljum sjálfsögð hafa sjaldnast fengist nema vegna mikillar baráttu. Sú barátta hefur skilað mikilvægum framförum á undanförnum tveimur árum. Tveir lagabálkar um jafna meðferð fólks tóku gildi í fyrra og nú á árinu samþykkti Alþingi lög um kynrænt sjálfræði sem marka tímamót fyrir þau sem vilja velja sér kyn og breyta kynskráningu sinni. Það var sérlega gleðilegt hve breið pólitísk samstaða var um málin á þingi. Á haustmánuðum rifjaðist hins vegar upp fyrir mörgum að svo hefur ekki alltaf verið þegar hinir afbragðs góðu þættir Hrafnhildar Gunnarsdóttur, Svona fólk, voru sýndir í Ríkissjónvarpinu.

Framundan er vinna við endurskoðun jafnréttislaga og á þessu ári var  mikilvægt skref stigið í jafnréttisátt þegar ný þungunarrofslöggjöf var samþykkt sem styrkir sjálfsákvörðunarrétt kvenna yfir eigin líkama. Þegar kemur að jafnrétti kynjanna er þó enn mikið verk óunnið, ekki síst á sviði kynbundins ofbeldis, sem fjallað var um á Metoo-ráðstefnu stjórnvalda í Hörpu í haust sem vakti athygli langt út fyrir landsteinana. Markmið okkar á að vera að útrýma meinsemdinni sem kynbundið ofbeldi er, með skýrri stefnu og aðgerðum eigum við að sýna í verki að það er hægt.

Tími aðgerða er kominn

Í haust sótti ég loftslagsfund Sameinuðu þjóðanna í New York og var þar beðin að fjalla um aðgerðir Íslendinga í kolefnisbindingu. Þar höfum við ýmislegt fram að færa, hvort sem er í hefðbundnum aðgerðum á sviði landgræðslu, skógræktar og endurheimtar votlendis eða í nýsköpun á þessu sviði þar sem íslenskir aðilar hafa verið að þróa nýja tækni í kolefnisbindingu.

Ísland stefnir að kolefnishlutleysi í síðasta lagi 2040 en við verðum að sýna árangur strax í þeirri vegferð. Orkuskipti í samgöngum og aukin kolefnisbinding eru lykilatriði í aðgerðaáætlun stjórnvalda. Grænar ívilnanir og grænir skattar munu flýta fyrir orkuskiptum – en nú um áramótin taka gildi nýjar ívilnanir gagnvart rafhjólum og reiðhjólum – og eins mikil fjárfesting í almenningssamgöngum á höfuðborgarsvæðinu, í gegnum borgarlínuverkefnið. Með verkefnum í landgræðslu, skógrækt og endurheimt votlendis sem eru þegar farin af stað munum við binda 50% meira kolefni árlega árið 2030 en við gerum núna. Stjórnvöld og atvinnulíf tóku höndum saman um stofnun Grænvangs, samráðsvettvangs um aðgerðir á sviði loftslagsmála og þegar opinberir styrkir til uppsetningar hraðhleðslustöðva um landið allt voru kynntir tók atvinnulífið rækilega við sér en alls má gera ráð fyrir um hálfum milljarði í fjárfestingu í hleðslustöðvum á komandi ári. Ákveðið var að forgangsraða fjármunum í nýrri markáætlun í rannsóknir á loftslagsmálum og sett var ný löggjöf um loftslagsmál.

Við munum ekki ná árangri í  baráttunni gegn hamfarahlýnun nema við tryggjum um leið velsæld fólks og blómlegt og sjálfbært efnahagslíf. Það er krefjandi úrlausnarefni en um leið eigum við alla möguleika á að ná góðum árangri. Á árinu sem var að líða voru fimmtíu ár liðin síðan menn lentu á tunglinu. Ef mannkynið gat leyst úr því viðfangsefni þá munum við líka geta tekist á við loftslagsvána. Þar munum við hlusta á skýra leiðsögn vísindanna sem hafa lagt staðreyndir á borðið en einnig tillögur um aðgerðir.

Samheldni til framtíðar

Við sem hér búum ættum að vita það manna best hve miklu veður og umhverfi skipta okkur öll. Óveðrið sem gekk yfir landið í desember var okkur áminning um það hve háð við erum náttúruöflunum og það tjón sem aldrei verður bætt er sá mannskaði sem varð í veðrinu norður í Sölvadal.

Vegir lokuðust og samgöngur stöðvuðust, foktjón varð verulegt og íbúar á Norðurlandi máttu þola umfangsmesta rafmagnsleysi síðari tíma. Það minnti okkur líka á að líf okkar allt er orðið mun háðara rafmagni en áður. Fjarskipti eru háð rafmagni, fjós eru háð rafmagni og svo mætti lengi telja. Ríkisstjórnin ákvað því að setja á laggirnar átakshóp sem vinnur nú hratt að því að skila tillögum til stjórnvalda um forgangsröðun aðgerða og breytt skipulag til að tryggja betur þá innviði sem við þurfum á að halda um land allt.

En slíkt veður minnir okkur líka á það sem við eigum hér á Íslandi. Þann kraft sem býr í samfélaginu og birtist í fólkinu sem tekst á við áföll og áskoranir, birtist í þeim 94 björgunarsveitum sem starfa um land allt, mannaðar þúsundum sjálfboðaliða, sem alltaf eru reiðubúnir til að standa vaktina og leggja sjálfa sig í hættu við að bjarga fólki og veraldlegum eigum. Þessi samfélagslegi kraftur eru mestu verðmæti nokkurs samfélags og birtist í samheldninni og samstöðunni á erfiðum tímum. Við erum á slíkum stundum ein þjóð í einu landi, óháð öllu öðru sem skilur okkur að. Fyrir það getum við verið þakklát þegar við horfum fram á veg og höldum á vit nýrra verkefna og nýrra áskorana.

Ég óska landsmönnum öllum gleðilegs árs.

Katrín Jakobsdóttir, forsætisráðherra.

The post Ár framfara og áskorana appeared first on Vinstri græn.

Fundurinn hefst klukkan 17.00 á föstudeginum og lýkur klukkan 14.00 á laugardeginum.

Flokksráðsfundir eru opnir öllum félögum í VG.

The post Flokksráðsfundur í Félagsheimili Seltjarnarnes appeared first on Vinstri græn.