Forsætisráðherra heimsækir miðstöð þolenda ofbeldis í Bjarkarhlíð.

Katrín Jakobsdóttir, forsætisráðherra, heimsótti Bjarkarhlíð, miðstöð fyrir þolendur ofbeldis. Forsætisráðherra hitti starfsfólk og fékk greinargóða kynningu á starfsemi Bjarkarhlíðar.

Katrín Jakobsdóttir, forsætisráðherra:

„Starfsemi Bjarkarhlíðar er mikilvæg viðbót við þau úrræði sem í boði er fyrir þolendur ofbeldis. Nú hefur Bjarkarhlíð verið opin í tvö ár og það er sérstaklega ánægjulegt að sjá hversu vel henni hefur verið tekið og reynsla þeirra sem hafa leitað til Bjarkahlíðar er góð. Þarna er lögð áhersla á þverfaglega samvinnu lykilstofnana og samtaka í öruggu umhverfi þar sem konur og karlar á öllum aldri geta komið og fengið aðstoð og ráðgjöf, sér að kostnaðarlausu.“

Vinstri Græn þekkja Bjarkarhlíð vel, enda fór verkefnið af stað af frumkvæði Sóleyjar Tómasdóttur þáverandi borgarfulltrúa og er Elín Oddný​ þar nú varamaður í stjórn.

Markmið með stofnun Bjarkarhlíðar var að veita samhæfðan stuðning og ráðgjöf til þolenda ofbeldis, en auk þess stuðla að fræðslu um eðli og afleiðingar ofbeldis og gefa skýr skilaboð um að ofbeldi verði ekki liðið í okkar samfélagi.

Markmið Bjarkarhlíðar er að veita stuðning og ráðgjöf ásamt fræðslu og umfjöllun um eðli og afleiðingar ofbeldis, auk þess að gefa skýr skilaboð um að ofbeldi verði ekki liðið. Bjarkarhlíð býður upp á fyrirlestra og námskeið um birtingarmyndir ofbeldis og afleiðingar þess. Bjarkarhlíð er samstarfsverkefni Reykjavíkurborgar, félagsmálaráðuneytis, dómsmálaráðuneytis, Lögreglunnar á höfuðborgarsvæðinu, Samtaka um kvennaathvarf, Stígamóta, Drekaslóðar, Mannréttindaskrifstofu Íslands og Kvennaráðgjafarinnar.