Rafbílar ráðherra – umhverfisvænar samgöngur

Samkvæmt tillögu forsætisráðherra, sem samþykkt var í ríkisstjórn í morgun 6. nóvember, verða ráðherrabifreiðar rafvæddar. Er það í samræmi við loftslagsstefnu Stjórnarráðsins og aðgerðaáætlun stjórnvalda í loftslagsmálum.

Ákveðið var að hefja þegar undirbúning að útboðum í takt við þróun rafbíla á markaði hér á landi. Stefnt er að því að skipta út öllum ráðherrabifreiðum á næstu árum með það að markmiði að þeim tíma liðnum verði allar ráðherrabifreiðar knúnar rafmagni.

Þegar hafa verið settar upp rafhleðslustöðvar á bílastæði forsætisráðuneytis, umhverfis- og auðlindaráðuneytis, dómsmálaráðuneytis, samgöngu- og sveitarstjórnarráðuneytis og atvinnuvega- og nýsköpunarráðuneytis og stefnt er að uppsetningu slíkra stöðva á bílastæðum allra ráðuneyta á næstu mánuðum.

Umhverfisvænar samgöngur er stórt áherslumál hjá VG, eins og fram kom á fróðlegum fundi borgarmálahóps VG á Hallveigarstöðum einmitt í gær, þar sem Guðmundur Ingi Guðbrandsson, umhverfisráðherra, Guðmundur B. Friðriksson, skrifstofustjóri skrifstofu umhverfisgæða hjá Reykjavíkurborg og Líf Magneudóttir ræddu framtíðina í samgöngum og rafbílavæðingu á höfuðborgarsvæðinu. Myndin er af frummælendum á VG fundinum í gær.