Eftir ræðurnar göngum við í verkin

Deildu 

Við náðum saman tökum á útbreiðslu kór­ónu­veirunnar í upp­hafi árs­ins sem var ekki lítið átak. Veiran er vissu­lega enn til stað­ar, en veldur ekki sama usla og áður. Við höfðum þó ekki fyrr aflétt flestum tak­mörk­unum í sam­fé­lag­inu vegna kór­ónu­veirunnar að Rússar réð­ust inn í Úkra­ínu. Afleið­ingar inn­rás­ar­innar hafa verið eitt stærsta málið sem rík­is­stjórnin hefur tek­ist á við á árinu 2022. Rík­is­stjórnin brást við líkt og önnur Evr­ópu­ríki og virkj­aði 44. gr. laga um útlend­inga sem kveður á um sam­eig­in­lega vernd vegna fjölda­flótta. Við höfum tekið á móti rúm­lega fjögur þús­undum á flótta, flestum frá Úkra­ínu, og við­bragð okkar Íslend­inga hefur verið okkur til sóma, bæði í mót­töku flótta­fólks hér heima og með auknum beinum stuðn­ingi við Úkra­ínu í gegnum utan­rík­is­ráðu­neyt­ið. Ég vil þakka sér­stak­lega öllum þeim sem hafa lagt mikið á sig vegna þess­ara breyttu aðstæðna, það verður til þess að við getum horft stolt til baka þegar fram líð­ur.

Stór­aukin áhersla á mót­töku flótta­fólks og gerð inn­flytj­enda­stefnu

Félags- og vinnu­mark­aðs­ráðu­neytið hefur verið í hring­iðu mót­töku á flótta­fólki og tók for­ystu í stofnun mót­töku­mið­stöðvar fólks á flótta í hús­næði sem áður hýsti Domus Med­ica. Þetta gerir umsækj­endum um alþjóð­lega vernd kleift að sækja þjón­ustu stofn­ana rík­is­ins á einn stað, sem hefur stór­bætt þjón­ust­una. Í fram­haldi hófust samn­inga­við­ræður við sveit­ar­fé­lög um sam­ræmda mót­töku flótta­fólks og nú í vetur er verið að koma samn­ingum til fram­kvæmd­ar. Í samn­ing­unum felst fjár­hags­leg aðstoð rík­is­ins við lög­bundin hlut­verk sveit­ar­fé­laga í að taka á móti flótta­fólki, með það að mark­miði að gera flótta­fólki auð­veld­ara að kom­ast inn í sam­fé­lagið og verða virkir þátt­tak­endur í leik og starfi. Þá er búið að tryggja aukið fjár­magn til íslensku­kennslu fyrir inn­flytj­endur á næsta ári sem er lyk­ill­inn að því að aðlag­ast sam­fé­lag­inu. Við­brögð okkar allra núna munu hafa mikil áhrif á hvernig til tekst í fram­tíð­inni.

Talandi um fram­tíð­ina, þá skip­aði ég nýlega starfs­hóp um mótun stefnu í mál­efnum inn­flytj­enda og flótta­fólks á Íslandi. Slík stefna er ekki til en mik­il­vægi hennar er aug­ljóst. Um 18% lands­manna eru af erlendu bergi brot­in. Í öllum þeim fjöl­breyti­leika fel­ast marg­vís­leg tæki­færi fyrir íslenskt sam­fé­lag, en það eru fjöl­margar áskor­anir sem einnig fylgja, ekki síst að fólk nái að aðlag­ast sam­fé­lag­inu og fá sömu tæki­færi hér og hver önn­ur. Þannig þarf að huga sér­stak­lega vel að íslensku­kennslu í skólum og íslensku sem annað tungu­mál fyrir full­orðið fólk. Við þurfum einnig að meta menntun og reynslu fólks sem hingað kemur að meiri verð­leikum og nýta þannig þekk­ingu inn­flytj­enda þjóð­fé­lag­inu til fram­drátt­ar.

AUGLÝSING

https://static.airserve.net/kjarninn/websites/kjarninn/adzones/grein-midjufleki-1/banner177292.html

Fjár­munum beint þar sem þeir gera mest gagn

Í efna­hags­málum höfum við hér heima á Íslandi glímt við vax­andi verð­bólgu líkt og önnur lönd hafa gert. Verð­bólgan stafar bæði af aðstæðum hér inn­an­lands, ekki síst á hús­næð­is­mark­aði, en líka af utan­að­kom­andi þáttum í öðrum löndum sem erfitt er að ráða við. Staða rík­is­fjár­mála er mun betri en fyrri áætl­anir gerðu ráð fyrir og bati í efna­hags­líf­inu hefur verið mun skjót­ari en búist var við, til dæmis hefur ferða­þjón­ustan tekið hraðar við sér en gert var ráð fyr­ir. Snarpur efna­hags­legur bati er ekki síst vegna þess að okkur auðn­að­ist með mark­vissum aðgerðum að halda atvinnu­líf­inu á lífi við ótrú­lega krefj­andi aðstæður á meðan á kór­ónu­veiru­far­aldr­inum stóð og aðgerðir gegn atvinnu­leysi skil­uðu góðum árangri. Verð­bólgan mun áfram verða eitt meg­in­við­fangs­efni efna­hags­stjórn­un­ar­innar á næsta ári.

Stuðn­ingur við kjara­samn­inga á mik­il­vægum tímum

Sá mik­il­vægi áfangi náð­ist nú í des­em­ber að kjara­samn­ingar voru und­ir­rit­aðir fyrir stærstan hluta launa­fólks á almennum vinnu­mark­aði. Flest félög innan Starfs­greina­sam­bands Íslands voru í far­ar­broddi og versl­un­ar­menn og sam­flot iðn- og tækni­fólks fylgdi svo í kjöl­far­ið. Við­ræður eru enn í gangi á milli Sam­taka atvinnu­lífs­ins og Efl­ingar og vona ég sann­ar­lega að við­semj­endur nái fljótt saman á nýju ári.

Kjara­samn­ingar fyrir stærstan hluta launa­fólks á almennum vinnu­mark­aði er mik­il­vægur og jákvæður áfangi á óvissu­tím­um. Rík­is­stjórnin er í stöð­ugu sam­tali við aðila vinnu­mark­að­ar­ins og hefur á und­an­förum mán­uðum átt í nánu sam­tali við þau um aðgerðir til að greiða fyrir samn­ingum sem styðja við mark­mið þeirra um að skapa for­sendur fyrir stöð­ug­leika í efna­hags­málum með lækkun verð­bólgu og vaxta og þannig náum við meðal ann­ars að verja kaup­mátt og lífs­kjör launa­fólks.

Byggt verði meira hús­næði og stutt við barna­fólk

Í hús­næð­is­málum mun bygg­ingu nýrra íbúða fjölga í sam­starfi við sveit­ar­fé­lög og haldið verður áfram upp­bygg­ingu í almenna íbúða­kerf­inu með auknum stofn­fram­lögum frá rík­inu sem nemur 4 millj­örðum króna á næsta ári. Sú upp­bygg­ing bæt­ist við þær 3.000 íbúðir sem byggðar hafa verið upp í almenna íbúða­kerf­inu á und­an­förnum árum m.a. í góðu sam­starfi við verka­lýðs­hreyf­ing­una í gegn um Bjarg íbúða­fé­lag sem hefur reynst afar mik­il­vægt til að lækka hús­næð­is­kostnað og auka hús­næð­is­ör­yggi tekju­lægri heim­ila. Einnig verður áfram unnið að því að bæta rétt­ar­stöðu leigj­enda með breyt­ingum á hús­næð­is­lög­um.

Hús­næð­is­stuðn­ingur verður auk­inn nú um ára­mótin með 13,8% hækkun hús­næð­is­bóta til leigj­enda. Þessi aukn­ing kemur til við­bótar þeirri 10% hækkun sem kom til fram­kvæmda 1. júní síð­ast­lið­inn. Þá munu eign­ar­skerð­ing­ar­mörk í vaxta­bóta­kerf­inu hækka um 50% sem mun styðja betur við eigna­minni heim­ili. Auk þess verður heim­ild til skatt­frjálsrar nýt­ingar á sér­eign­ar­sparn­aði til kaupa á íbúð­ar­hús­næði til eigin nota eða ráð­stöf­unar inn á höf­uð­stól fram­lengd til árs­loka 2024.

Stuðn­ingur við barna­fjöl­skyldur verður efldur og fjöl­skyldum sem fá barna­bætur mun fjölga um nærri þrjú þús­und. Þannig mun heild­ar­fjár­hæð sem varið verður til barna­bóta á næstu tveimur árum verða 5 millj­örðum hærri en ann­ars hefði orðið í óbreyttu kerfi. Barna­bóta­kerfið verður ein­fald­að, dregið úr skerð­ingum og teknar upp sam­tíma­greiðslur þannig að bið­tími eftir barna­bótum verði aldrei lengri en 4 mán­uðir frá fæð­ingu barns.

Sorg­ar­leyfi við barns­missi

Alþingi sam­þykkti frum­varp mitt á árinu um sorg­ar­leyfi þar sem for­eldrum á vinnu­mark­aði er tryggt leyfi frá störfum í kjöl­far barns­missis auk þess sem þau fá greiðslur til að koma til móts við tekju­tap á til­teknu tíma­bili í tengslum við fjar­veru frá vinnu­mark­aði. Nið­ur­stöður rann­sókna sýna fram á mik­il­vægi þess að ein­stak­lingar sem verða fyrir áföllum í líf­inu haldi sam­bandi við vinnu­mark­að­inn eins og þeir treysta sér til hverju sinni. Mark­miðið með frum­varp­inu er að við­ur­kenna áhrif sorg­ar­innar vegna barns­missis á fjöl­skyld­una í heild, ásamt því að auka líkur á að for­eldrar eigi far­sæla end­ur­komu á vinnu­markað og taki frekar virkan þátt í sam­fé­lag­inu í kjöl­far barns­miss­is.

End­ur­skoðun örorku­líf­eyr­is­kerf­is­ins stærsta málið

Rík­is­stjórnin greip til aðgerða um mitt ár 2022 og hækk­aði fjár­hæðir almanna­trygg­inga og hús­næð­is­bæt­ur. Var það gert til að bregð­ast við hækk­andi verð­bólgu. Nú um ára­mót munu svo greiðslur almanna­trygg­inga hækka til móts við hækk­andi verð­bólgu, en ljóst er einnig að horfa þarf enn betur til kjara örorku­líf­eyr­is­þega og þess eldra fólks sem minnst hefur á milli hand­anna. Vinna er í gangi við mótun til­lagna í þá veru.

Það er mín stefna og áherslu­mál að við byggjum rétt­látt sam­fé­lag þar sem við öll getum notið styrk­leika okk­ar. Það er flestum ljóst að örorku- og end­ur­hæf­ing­ar­líf­eyr­is­kerfið hefur beðið lengi eftir end­ur­nýj­un. Kerfið er flókið og stag­bætt eftir lag­fær­ingar og við­bætur gegnum árin og löngu kom­inn tími á heild­ar­end­ur­skoðun í átt að ein­földun og gegn­sæi. Þessi vinna er hafin og þegar farin að skila jákvæðum breyt­ing­um, en Alþingi sam­þykkti nýlega frum­varp mitt um hækkun frí­tekju­marks örorku- og end­ur­hæf­ing­ar­líf­eyr­is­þega úr tæpum 110.000 krónum í 200.000 krónur og taka þær breyt­ingar gildi um ára­mót­in. Þá sam­þykkti Alþingi einnig leng­ingu á tím­anum sem hægt er að stunda end­ur­hæf­ingu úr þrem árum í fimm. Þetta er hvoru tveggja gert til að auka líkur á að fólk með mis­mikla starfs­getu geti stundað vinnu. Í því sam­hengi er einnig mik­il­vægt að okkur auðn­ist að fjölga hluta­störfum og sveigj­an­legum störf­um, en vinna er í gangi við það.

Ég stefni á að kynna til­lögur að frek­ari breyt­ingum á örorku­líf­eyr­is­kerf­inu fljót­lega á nýju ári sem hafa það að mark­miði að skapa aukin tæki­færi og betri kjör fyrir fólk með mis­mikla starfs­getu. Ég vil fá að þakka hag­að­ilum fyrir sam­starf að þessum mál­um.

Fatlað fólk á að njóta sömu rétt­inda og tæki­færa og hver önnur

Við eigum öll sama rétt til tæki­færa í líf­inu. Ég hef frá upp­hafi ráð­herra­tíðar minnar lagt mikla áherslu á stöðu fatl­aðs fólks, hinsegin fólks og inn­flytj­enda, en tæki­færi þeirra eru oft tak­mark­aðri en ann­arra. Á þessu kjör­tíma­bili verður Samn­ingur Sam­ein­uðu þjóð­anna um rétt­indi fatl­aðs fólks lög­festur og komið á fót óháðri Mann­rétt­inda­stofn­un, en þessi vinna er á ábyrgð for­sæt­is­ráð­herra. Undir ábyrgð mína fellur að vinna að gerð lands­á­ætl­unar um inn­leið­ingu samn­ings­ins sem mun verða grund­vall­ar­breyt­ing hvað varðar við­ur­kenn­ingu á rétt­ind­um, mennt­un, störfum og aðgengi fatl­aðs fólks. Vinna verk­efna­stjórnar og starfs­hópa stendur yfir og við munum kynna drög að lands­á­ætlun snemma á næsta ári.

Einnig var sam­þykkt á Alþingi núna fyrir jólin að fjölga samn­ingum fatl­aðs fólks um not­enda­stýrða per­sónu­lega aðstoð (NPA) um helm­ing á næsta ári sem skiptir gríð­ar­lega miklu máli til að auka lífs­gæði og þátt­töku í sam­fé­lag­inu. Einnig stendur yfir umfangs­mikil vinna við að bæta úr aðgengi fatl­aðs fólks að hinum staf­ræna heimi. Komið var á fót raf­rænum nám­skeiðum fyrir per­sónu­lega tals­menn fatl­aðs fólks og staf­rænn tals­manna­grunnur tek­inn í notkun sem er stórt skref og mik­il­vægt í að gera staf­ræna umbreyt­ingu mögu­lega fyrir fatlað fólk. Þá tekur til starfa eftir ára­mót starfs­hópur sem á að skila mér til­lögum að auknum starfs- og mennta­tæki­færum fatl­aðs fólks. Það er fátt meira gef­andi en að taka þátt í að auka tæki­færi fólks til betra lífs.

Hækkum um fimm sæti á Regn­boga­kort­inu

Undir for­ystu Katrínar Jak­obs­dóttur for­sæt­is­ráð­herra sem stýrir jafn­rétt­is­málum hér­lendis hefur á síð­ustu árum verið gripið til mark­vissra umbóta í mál­efnum hinsegin fólk, með lög­gjöf og auknum fjár­hags­legum stuðn­ingi við mann­rétt­inda­sam­tök á borð við Sam­tökin 78. Á árinu 2022 hélt sú vinna áfram en þá sam­þykkti Alþingi fyrstu aðgerð­ar­á­ætlun á Íslandi í mál­efnum hinsegin fólks fyrir árin 2022-2025. Þá er í gangi vinna starfs­hóps vegna hat­urs­orð­ræðu, sem kemur meðal ann­ars inn á hinsegin fólk og að vænta til­lagna á næsta ári.

Regn­boga­kort ILGA Europe er mæli­kvarði á stöðu rétt­inda hinsegin fólks. Við hækk­uðum úr 14. sæti upp í það 9 við síð­ustu mæl­ingu. Engu að síður hefur orðið bakslag í við­horfum og fram­komu við hinsegin fólk, bæði hér­lendis og erlend­is, ekki síst meðal ungs fólks. Það er áfram­hald­andi verk­efni að verja og berj­ast fyrir rétt­indum hinsegin fólks og rík­is­stjórn Katrínar Jak­obs­dóttur mun ótrauð vinna áfram að því verk­efni.

Auð­lindir Íslands og mat­væla­ör­yggi Íslend­inga

Það er mik­il­vægt að við búum okkur til umhverfi þar sem við getum verið sem mest sjálf­bær hvað varðar mat­væla­ör­yggi og verjum þær auð­lindir sem við byggjum vel­ferð okkar á. Slík vinna bar þegar árangur þegar Svan­dís Svav­ars­dóttir mat­væla­ráð­herra skip­aði sprett­hóp síð­ast­liðið vor um mat­væla­fram­leiðslu sem sendi inn til­lögur um styrki til grein­ar­innar til að verja íslenska mat­væla­fram­leiðslu. Styrkirnir voru svo afgreiddir í haust, en þeir voru ekki síst mik­il­vægir sauð­fjár­bænd­um, en staða þeirra hefur verið erfið um ára­bil. Þá er verið að skoða til­lögur um aukið vægi korn­ræktar til að stuðla enn fremur að fæðu­ör­yggi okk­ar.

Í lok maí 2022 skip­aði mat­væla­ráð­herra fjóra starfs­hópa til að greina áskor­anir og tæki­færi í sjáv­ar­út­vegi og tengdum greinum ásamt því að meta þjóð­hags­legan ávinn­ing fisk­veiði­stjórn­un­ar­kerf­is­ins. Starfs­hóp­arnir fjalla um sam­fé­lag, aðgengi, umgengni og tæki­færi. Úr þeirri vinnu erum við að stefna á að skapa nýjan ramma þegar kemur að því hvernig við umgöng­umst og ávöxtum auð­lind­irnar okkar á sem bestan hátt.

Sjálfur hef ég sér­stakan áhuga á fram­tíð fisk­eldis hér á landi, en ég hef lengi talað fyrir því að lax­eldi í sjó verði að þró­ast úr opnum sjó­kvíum yfir í lok­aðar sjó­kvíar og/eða fær­ast upp á land. Umhverf­is­á­hrif opins sjó­kvía­eld­is, hvort sem horft er til stað­bund­innar meng­unar frá úrgangi, laxalúsar eða erfða­blönd­unar við villtan lax, eru að mínu mati of mik­il. Á sama tíma fer mik­il­vægi þess­arar atvinnu­greinar ört vax­andi, bæði á lands­vísu, en ekki síst í byggðum þar sem hallað hefur undan fæti. Einmitt þess vegna er gríð­ar­lega mik­il­vægt að tekin verði stefnu­mót­andi ákvörðun um hvernig við viljum sjá fisk­eldi þró­ast á næstu árum og ára­tug­um, í sátt við nátt­úr­una. Ég von­ast til að við fáum góðar til­lögur úr starfs­hópum mat­væla­ráð­herra.

Mik­il­væg vatns­föll komin í vernd­ar­flokk ramma­á­ætl­unar

Á árinu sem leið var ramma­á­ætlun um vernd og orku­nýt­ingu land­svæða loks­ins sam­þykkt á Alþingi. Ég tel sam­þykki áætl­un­ar­innar mik­il­væga ekki síst til að þetta öfl­uga stjórn­tæki geti áfram lif­að, því það væri verra að fara aftur til þess tíma þegar teknar voru ákvarð­anir um hverja og eina virkj­un­ar­hug­mynd. Ramma­á­ætlun tekur nefni­lega frá svæði í vernd­ar­flokk, þar sem ekki má virkja, sem er afar mik­il­vægt tæki í nátt­úru­vernd.

Vissu­lega þarf mála­miðl­anir til að afgreiða mál sem þetta og við í VG stóðum að slíkri mála­miðl­un. Hún þýðir að sum þeirra svæða sem við hefðum viljað sjá í vernd­ar­flokki fara aftur til skoð­unar (í bið­flokk), en á móti kemur að önnur mik­il­væg svæði sem flokk­ast höfðu í nýt­ing­ar­flokk í til­lögu að ramma­á­ætlun og mikil and­staða var við, meðal ann­ars Skrokkalda á hálend­inu, fara líka aftur til skoð­un­ar. Mik­il­væg­ast er að stór vatns­föll á borð við Skaftá og Skjálf­anda­fljót með Ald­eyj­ar­fossi og fleiri nátt­úru­undrum, eru nú komin í vernd­ar­flokk ramma­á­ætl­unar eins og nátt­úru­vernd­ar­fólk hefur lengi barist fyr­ir. Því fagna ég.

Vatna­skil í úrgangs­málum

Það verður stórt skref stigið á þessu ári þegar sveit­ar­fé­lög hefja inn­leið­ingu á breyttri lög­gjöf varð­andi úrgangs­mál. Þetta er risa­stórt skref og hluti af því að styðja við hringrás­ar­hag­kerfi hér­lend­is. Aðdrag­andi þessa er sam­þykkt frum­varps míns sem umhverf­is­ráð­herra 2021 og byggir á úrgangs­stefnu sem sett var í ráð­herra­tíð minni. Lögin taka gildi 1. jan­úar 2023.

Lög­gjöf­inni er ætlað að draga úr losun gróð­ur­húsa­loft­teg­unda frá með­höndlun úrgangs, stuðla að sjálf­bærri auð­linda­nýt­ingu og að úrgangur sé með­höndl­aður á þann hátt að hann skapi ekki hættu fyrir menn eða dýr eða valdi skaða í umhverf­inu. Þá verður skylda að flokka sorp hvort sem er á heim­ilum eða hjá fyr­ir­tækj­um, sorp­flokkun verður sam­ræmd á öllu land­inu, þannig að við þurfum ekki að flokka með mis­mun­andi hætti eftir sveit­ar­fé­lög­um. Sveit­ar­fé­lögin fá einnig laga­lega heim­ild til að rukka fólk eftir því hve miklu rusli það hendir og eftir því hversu dug­legt það er að flokka.

Við skulum taka þessum breyt­ingum vel því við getum haft umtals­verð áhrif fyrir nátt­úru og lofts­lag með þessum breyt­ing­um.

Vernd 30% haf- og land­svæða

Þau gleði­legu tíð­indi urðu nú í des­em­ber að tæp­lega 190 ríki sem eru aðilar að Samn­ingi Sam­ein­uðu þjóð­anna um líf­fræði­legan fjöl­breyti­leika komust að tíma­móta­sam­komu­lagi um skil­virka verndun og stjórnun a.m.k. 30% af landi, strand­svæðum og haf­svæðum heims­ins fyrir árið 2030. Sem stendur eru 17% lands og um 10% pró­sent haf­svæða í vernd á heims­vísu. Við Íslend­ingar höfum verndað um 24% af land­svæðum okkar en vel innan við 1% af haf­svæðum svo það eru næg sókn­ar­færi þar. Í ráð­herra­tíð minni sem umhverf­is­ráð­herra frið­lýsti ég yfir 30 svæði, ýmist var um að ræða stækkun þegar frið­lýstra svæða eða ný svæði. Má þar nefna Geysi, Goða­foss, Látra­bjarg, Kerl­ing­ar­fjöll, Dranga á Strönd­um, Stór­urð og Gerp­is­svæð­ið, auk umfangs­mik­illa stækk­ana á Vatna­jök­uls­þjóð­garði og Þjóð­garð­inum Snæ­fellsjökli. Þá frið­lýsti ég nokkur vatna­svið og háhita­svæði gegn orku­vinnslu í sam­ræmi við ramma­á­ætl­un.

Betri umgjörð um fram­tíð okkar á efri árum

Á árinu 2022 settum ég og Willum Þór Þórs­son heil­brigð­is­ráð­herra, í góðu sam­starfi með sam­bandi íslenskra sveit­ar­fé­laga, Lands­sam­bandi eldri borg­ara og fjár­mála­ráðu­neyt­inu, í gang heild­ar­end­ur­skoðun á þjón­ustu við eldra fólk. Við ætlum að sam­eina krafta félags- og heil­brigð­is­þjón­ustu til þess að veita sam­fellda þjón­ustu þegar og þar sem fólk­inu hent­ar. Verk­efnið heitir Gott að eld­ast og hafa drög að aðgerða­á­ætlun verið sett í sam­ráðs­gátt. Ég vil sjá miklar breyt­ingar á næstu árum til þess að við getum öll haft meiri tæki­færi til þess að njóta þjón­ustu heima fyrir og stuðla að meiri virkni okkar allra sem er lyk­ill að því að við­halda góðri heilsu and­lega sem lík­am­lega. Þessi vinna er að horfa til nútíðar sem og 50 ár fram í tím­ann og væntum við mik­ils af henni.

For­mennska í Nor­rænu ráð­herra­nefnd­inni á næsta ári

Á þessu ári hefur verið unnið að þeim áherslum sem Ísland vil sjá í nor­rænu sam­starfi undir hatti Nor­rænu ráð­herra­nefnd­ar­innar en ég gegni for­mennsku í nefnd­inni fyrir Íslands hönd á næsta ári. Stefna ráð­herra­nefnd­ar­innar er að Norð­ur­lönd eiga að vera sjálf­bærasta og sam­þættasta svæði heims árið 2030 og verður áfram unnið að þeim yfir­mark­mið­um. Ísland verður með sér­staka áherslu á frið á for­mennsku­ár­inu. Norð­ur­löndin leit­ast við að vera tals­menn frið­sælla lausna á heims­vís­u og státa af sterkum og öfl­ugum vel­ferð­ar­kerf­um, miklu sam­fé­lags­ör­yggi og miklum lífs­gæð­um. Við munum því leit­ast við að fjalla um mik­il­vægi friðar sem und­ir­stöðu vel­ferð­ar­sam­fé­lags­ins, kven­frels­is, sjálf­bærni og umhverf­is­verndar í sam­ræmi við fram­tíð­ar­sýn Nor­rænu ráð­herra­nefnd­ar­innar til 2030 og verður stór ráð­stefna um frið haldin á Íslandi á árinu 2023.

Að lokum

Verk­efnin framundan eru stór en ábat­inn af því vinna að rétt­lát­ara og betra sam­fé­lagi fyrir okkur öll er ómældur og við höldum ótrauð áfram.

Að lokum óska ég ykkur öllum gleði­legs árs og far­sældar á kom­andi ári og þakka kær­lega gjöf­ult sam­starf á árinu sem er að líða.

Guðmundur Ingi Guðbrandsson, vinnu­mark­aðs­ráð­herra, sam­starfs­ráð­herra Norð­ur­landa og vara­for­maður Vinstri grænna.

Vinstrihreyfingin – grænt framboð

Túngötu 14

101 Reykjavík

vg@vg.is

KT: 421298-2709

Þessi síða styðst við vafrakökur (cookies) til að bæta virkni síðunnar. Með því að vafra um síðuna samþykkir þú notkun þeirra.