Eigum við að taka séns á Ástjörn?

Deildu 

Til stendur að byggja fjölnota knatthús á íþróttasvæði Hauka við Ástjörn. Byggingin er svar við kalli eftir bættri aðstöðu fyrir knattspyrnuiðkendur félagsins sem búið hafa við aðstöðuleysi, einkum yfir vetrartímann. Jafnframt eru fyrirhugaðir fjórir æfingavellir og íbúðabyggð á svæðinu.

Ástjörn og umhverfi hennar var friðlýst árið 1987 og árið 1996 var svæðið stækkað og stofnaður um það fólkvangur. Rökin fyrir friðlýsingunni voru auðugt náttúrufar og Ástjörn væri einstakt náttúrufyrirbæri sem ætti sér enga hliðstæðu í nágrenni þéttbýlis. Jafnframt að þar væri að finna flórgoðavarp, sem er afar sjaldgæft á Suðvesturlandi, en tegundin er á válista.

Bent hefur verið á að bygging knatthússins gangi nærri tjörninni og ógni friðlýsingarskilmálunum, vatnafari og lífríki tjarnarinnar. Jafnframt kunni framkvæmdirnar að stríða gegn lögum um náttúruvernd. Eldhraun líkt og það sem myndar Ástjörn nýtur sérstakrar friðunar. Jafnframt njóta stöðuvötn og tjarnir sem náð hafa ákveðinni stærð verndar. Það á við um Ástjörn.

Í umsögn Skipulagsstofnunar sem byggir á umsögnum fagstofnana (Umhverfisstofnunar, Náttúrufræðistofnunar, Minjastofnunar, Hafrannsóknarstofnunar og Heilbrigðiseftirlitsins) segir að mikil óvissa sé um áhrif framkvæmdanna á vatnafar Ástjarnar. Einnig að lítið megi út af bregða til að mótvægisaðgerðir skili tilætluðum árangri. Skipulagsstofnun bætir við að í ljósi þess hversu stórt húsið sé og hversu nærri það standi tjörninni þá megi búast við því að sjónræn áhrif af því verði töluverð og leggur til að kanna aðra staðsetningu fjær fólkvangsmörkum.

Knatthúsið og Ástjörnin í forgrunni

Náttúruverndarsamtökin Landvernd hafa einnig skrifað umsögn þar sem fram koma sömu varnaðarorð. Landvernd lýkur sínum orðum á að hvetja Hafnafjarðarbæ til að virða friðlýsingu svæðisins og falla frá frekari uppbyggingu mannvirkja svo nærri Ástjörn.

Við Hafnfirðingar eru lánsöm að hafa náttúruperlu eins og Ástjörn í bæjarlandinu. Svæðið er vinsælt útivistarsvæði sem aðeins á eftir að vaxa af verðleikum. Við getum einnig verið stolt af því að vera falið að vernda Ástjörn – líkt og við höfum gert með ágætum til þessa.

Eins mikilvægt og það er að halda áfram uppbyggingu íþróttasvæðisins á Ásvöllum þá er nauðsynlegt að það sé gert í sátt við Ástjörn og umhverfi hennar og virða friðlýsinguna og náttúruverndarlög.

Davíð Arnar Stefánsson sérfræðingur hjá Landgræðslunni
og sækist eftir fyrsta sæti á lista VG í Hafnarfirði fyrir bæjarstjórnarkosningarnar í vor.

Vinstrihreyfingin – grænt framboð

Túngötu 14

101 Reykjavík

vg@vg.is

KT: 421298-2709

Þessi síða styðst við vafrakökur (cookies) til að bæta virkni síðunnar. Með því að vafra um síðuna samþykkir þú notkun þeirra.