Flokksráðsfundur Vinstrihreyfingarinnar – græns framboðs, haldinn á Seltjarnarnesi 7.-8. febrúar 2020, fordæmir áætlun Bandaríkjaforseta um framtíðarskipan mála í Ísrael og Palestínu.
Áætlunin er skýrt brot á alþjóðalögum, enda gerir hún ráð fyrir því að ólöglegar landtökubyggðir Ísraela verði viðurkenndar sem ísraelskt landsvæði.
Áætlunin er bein ógn við friðarumleitanir á svæðinu, gengur gegn tveggja ríkja lausninni, útilokar Palestínumenn frá ákvarðanatöku um eigin framtíð og kyndir undir mismunun gegn Palestínumönnum, þar á meðal palestínskum ríkisborgurum í Ísrael.
Fundurinn skorar á íslensk stjórnvöld að halda málstað Palestínu á lofti í samræmi við viðurkenningu Íslands á sjálfstæði Palestínu og hvetja önnur ríki og öryggisráð Sameinuðu þjóðanna til að hafna áætlun Bandaríkjamanna.