Stefna mín sem heilbrigðisráðherra hefur verið að efla geðheilbrigðisþjónustu og bæta aðgengi að henni um allt land. Það hefur verið forgangsmál hjá mér að efla hina opinberu geðheilbrigðisþjónustu og í því skyni hafa fjárframlög verið aukin og aðgengi að þjónustu um allt land verið bætt.
Fjárframlög til geðheilbrigðismála hafa hækkað um rúman milljarð á kjörtímabilinu. Mest er hækkunin innan heilsugæslunnar, eða hækkun um rúmlega 800 milljónir króna. Í fjáraukalögum fyrir árið 2020 og á fjárlögum 2021 var samþykkt 540 milljóna viðbótarfjárveiting á hvoru ári vegna Covid-19 til að efla þverfaglega geðheilbrigðisþjónustu.
Aðgengi að geðheilbrigðisþjónustu hefur verið stóreflt um land allt, til dæmis í heilsugæslunni og með starfsemi geðheilsuteyma. Sálfræðingum hefur verið fjölgað í heilsugæslunni úr 33 upp í 66 á kjörtímabilinu og geðheilsuteymi um land allt hafa verið fjármögnuð og tekið til starfa. Á árinu 2020 sinntu teymin rúmlega 2.600 manns. Sérstakt geðheilsuteymi fyrir fanga hefur tekið til starfa og sérstakt geðheilsuteymi fyrir fjölskyldur. Nú í janúar ákvað ég að veita Heilbrigðisstofnun Austurlands 17 milljóna króna viðbótarfjárframlag til að efla geðheilbrigðisþjónustu í þágu íbúa Seyðisfjarðar í kjölfar hamfaranna sem þar urðu 18. desember síðastliðinn.
Samráð við notendur geðheilbrigðisþjónustu hefur verið aukið á kjörtímabilinu. Föstum samráðsfundum með notendum og veitendum geðheilbrigðisþjónustu og fulltrúum heilbrigðisráðuneytisins var komið af stað árið 2018 og til að bregðast sérstaklega við aðstæðum tengdum Covid-19 var í apríl 2020 í heilbrigðisráðuneytinu sett á fót geðráð sem hefur það hlutverk að tryggja samhæfða upplýsingagjöf til notenda geðheilbrigðisþjónustu. Vegna Covid-19 hafa tveir stýrihópar verið stofnaðir, annars vegar til að vakta geðheilsu þjóðarinnar og hins vegar að vakta lýðheilsu þjóðarinnar.
Unnið er að því að draga úr biðlistum fyrir ADHD-greiningar, bæði hjá börnum og fullorðnum, í samvinnu heilbrigðisráðuneytisins, Landspítala, ADHD-samtakanna og heilsugæslunnar og fyrirhugað er að innleiða geðrækt og forvarnir í leik-, grunn- og framhaldsskólum í samvinnu við menntamálaráðuneytið.
Geðheilbrigðisþing um stefnumótun og framtíðarsýn var haldið seint á árinu 2020 með á fjórða þúsund þátttakendum og sú vinna verður notuð sem grundvöllur í áframhaldandi vinnu að heildarstefnu í geðheilbrigðismálum til ársins 2030 í heilbrigðisráðuneytinu. Stefnan verður byggð á heilbrigðisstefnu.
Nú hafa verið stigin stór og mikilvæg skref í átt að enn öflugri geðheilbrigðisþjónustu í minni embættistíð. Verkefnunum er þó hvergi nærri lokið og ég mun halda áfram að leggja áherslu á þennan mikilvæga málaflokk.
Svandís Svavarsdóttir, heilbrigðisráðherra.