Hinsegin dagar standa nú yfir og saman gleðjumst við og fögnum af því tilefni. Við þökkum fyrir að búa í samfélagi þar sem mannréttindi allra eru virt og margbreytileikanum er fagnað. Hugur okkar er líka hjá þeim sem ruddu brautina, færðu fórnir og sýndu óþreytandi baráttuanda, til að færa okkur öllum betra samfélag þar sem við öll eigum kost á því að njóta ástar og lífshamingju sama í hvaða formi hún birtist.
Löggjöf og aðgerðir stjórnvalda skipta máli í allri mannréttindabaráttu. Í stjórnarsáttmála þessarar ríkisstjórnar stendur að Íslandi skuli komast í fremstu röð í málefnum hinsegin fólks. Það skiptir máli að löggjöf endurspegli veruleikann og geri öllum kleift að lifa og njóta sín á eigin forsendum.
Árið 2019 tóku í gildi ný lög um kynrænt sjálfræði og í lok 2020 voru gerðar á þeim breytingar sem fela í sér mikla réttarbót fyrir trans- og intersex fólk. Lögin bjóða upp á hlutlausa kynskráningu fyrir þau öll sem skilgreina kyn sitt utan kynjatvíhyggjunnar. Lögin eru mikilvæg að því leyti að þau styrkja sjálfsákvörðunarrétt og mannréttindi einstaklinga. Þá tryggja þau einnig réttindi barna sem fæðast með ódæmigerð kyneinkenni. Lögin marka tímamót og fela í sér mikilvægar breytingar á réttarstöðu hinsegin fólks.
En um leið og við gleðjumst yfir því sem hefur unnist, er jafn mikilvægt að horfast í augu við það alvarlega bakslag í réttindabaráttu hinsegin fólks sem orðið hefur víða um heimsíðastliðin ár, þar á meðal í löndum Evrópu. Við sjáum dæmi þess að stjórnvöld grafi undan réttindum, hatursglæpir hafa aukist og lög sem banna sýnileika hinsegin fólks eru orðin að veruleika. Þessi ískyggilega þróun sýnir okkur að við megum aldrei taka áunnum sigrum í réttindabaráttu sem gefnum hlut, við verðum að halda vöku okkar og standa saman.
Framundan eru stór verkefni á þessu sviði. Við munum halda baráttunni áfram og látum ekki deigan síga til að gera samfélagið betra fyrir okkur öll. Réttindabarátta hinsegin fólks er nefnilega ekki aðeins barátta hinsegin fólks, hún er barátta okkar allra. Hún er barátta fyrir betra, fallegra og frjálsara samfélagi sem kemur okkur öllum til góða og við skulum aldrei slaka á í þeirri baráttu.
Gleðilega hinsegin daga!