Kjördæmisráð Vinstri hreyfingarinnar græns framboðs í Suðurkjördæmi ákvað á fundi sínum í kvöld að efna til forvals fyrir Alþingiskosningarnar í september á næsta ári.
Efnt var til atkvæðagreiðslu um málið og var mikill meirihluti fundarmanna fylgjandi þeirri leið að hafa forval en ekki uppstillingu á framboðslistann. Nú þegar hafa nokkrir lýst vilja sínum til að skipa efstu sæti listans.
Núverandi þingmaður VG í Suðurkjördæmi Ari Trausti Guðmundsson gefur ekki kost á sér til endurkjörs, en hann stýrði fundi kjördæmisráðs í kvöld. Kosin var kjörstjórn á fundinum sem hittist á fyrsta fundi í næstu viku og skiptir með sér verkum, en hana skipa fulltrúar tilnefndir af formönnum svæðisfélaga VG í kjördæminu.
Ákveðið var að formaður kjördæmisráðsins Valgeir Bjarnason myndi starfa með kjörstjórn.