Enn ein perlan hefur bæst við í hóp friðlýstra svæða á Íslandi; náttúruvættið Stórurð og landslagsverndarsvæðið norðan Dyrfjalla. Stórurðin sjálf er náttúrudjásn sem nú hefur verið tryggð vernd og umsjón. Innan hins nýfriðlýsta svæðis eru líka alþjóðlega mikilvæg fuglasvæði, merkar sögulegar minjar, sérstæður gróður og selalátur, en selur hefur átt undir högg að sækja á undanförnum árum. Markmið friðlýsingarinnar er að vernda og varðveita sérstæðar jarðminjar og sérstætt landslag á svæðinu og standa vörð um líffræðilega fjölbreytni svæðisins með verndun vistkerfa. Undirritun friðlýsingarinnar fór fram við upphaf göngu að Hrafnabjörgum sem Ferðafélag Fljótsdalshéraðs skipulagði og fjöldi fólks tók þátt í.
Þessi friðlýsing er hluti af átaki í friðlýsingum sem ég setti af stað árið 2018 og unnið hefur verið að í samstarfi Umhverfisstofnunar og umhverfis- og auðlindaráðuneytisins. Við erum komin upp í #22 og fleiri væntanlegar á næstu vikum. Ég hvet ykkur til þess að heimsækja friðlýstu svæðin á ferðalögum ykkar um landið í sumar (þau eru orðin vel á annað hundrað). Þetta eru perlur íslenskrar náttúru, fráteknar fyrir okkur og komandi kynslóðir að njóta. Vefsíðan stefnumotvidnatturuna.is gæti t.d. verið ágætis byrjunarreitur, ef þú veist ekki hvar þú átt að byrja. Til hamingju með nýjustu perluna á perlufestinni.
Guðmundur Ingi Guðbrandsson, umhverfis- og auðlindaráðherra og varaformaður VG.