Fréttatilkynning frá Vinstri grænum í Reykjavík
Vinstri Græn í Reykjavík kynntu kosningaáherslur sínar fyrir borgarstjórnarkosningar í Reykjavík í Úlfarsárdal í dag. Þær voru kynntar af Líf Magneudóttir, Stefán Pálsson og Elín Björk Jónasdóttir sem skipa efstu þrjú sætin á framboðslista hreyfingarinnar til borgarstjórnar Reykjavíkur. Að kynningu lokinni hélt hópurinn í stutta sögugöngu um svæðið með Stefáni Pálssyni.
Kosningaáherslur Vinstri grænna í Reykjavík leggja áherslu á að auka lífsgæði borgarbúa. Til þess þarf að tryggja öllum öruggt heimili, heilbrigt umhverfi og tækifæri til þess að njóta lífsins í Reykjavík í leik og starfi.
Líf Magneudóttir, borgarfulltrúi, segir Vinstri græn vilja að Reykjavíkurborg gangi lengra til að tryggja nægt húsnæði fyrir borgarbúa. „Borgin þarf að gera meira en að úthluta lóðum og samþykkja skipulag og áætlanir. Hún þarf að fylgja málunum eftir og tryggja að áætlanir standist. Reykjavíkurborg á að vera hreyfiafl á húsnæðismarkaði og byggja húsnæði á viðráðanlegu verði. Hún á að styrkja hverfin og skapa forsendur fyrir aukinni þjónustu í þeim öllum. Vinstri græn vilja reisa Reykjavíkurbústaði þar sem öll geta eignast heimili.“
Elín Björk Jónasdóttir, veðurfræðingur segir Vinstri Græn vilja að Reykjavíkurborg gangi lengra í umhverfismálum og verði þar í broddi fylkingar. „Borgin þarf að gera borgarbúum kleift að ferðast með skjótari, hagkvæmari og umhverfisvænni hætti um borgina. Hún á að efla Strætó og flýta Borgarlínu svo hægt verði að styrkja öll hverfi. Hún á að hlúa að og fjölga grænum svæðum í öllum hverfum svo að borgarbúar geti notið útivistar og skapað börnum örugg og áhugaverð svæði til leiks. Vinstri græn vilja ganga lengra og tryggja að Reykjavík verði til fyrirmyndar í umhverfis- og loftslagsmálum.“
Stefán Pálsson, sagnfræðingur segir Vinstri græn vilja að Reykjavíkurborg gangi lengra til að koma á jöfnuði. „Borgin á að tryggja öllum börnum gjaldfrjálsa menntun í leik- og grunnskólum, vistvænar skólamáltíðir og skólahúsnæði sem uppfyllir allar kröfur til heilnæms umhverfis og nútímalegra kennsluhátta. Hún á að gefa öllum börnum tækifæri til fara í sumarfrístund með sumarfrístundakorti. Hún á að gefa öllum borgarbúum tækifæri til að kynnast heimi vísindanna í nýrri Vísindaveröld og efla þannig náttúru- og vísindalæsi og almenna gleði í Reykjavík.“