Hreindís Ylva tekur sæti í borgarstjórn

Deildu 

Fyrir aðeins örfáum dögum voru tvö ár síðan núverandi meirihluti í Reykjavík var myndaður. Þar stóð ég með okkar fremstu konum í borgarmálunum, Líf og Elínu Oddnýju og fagnaði því að fjöldinn allur af vinstri grænum málum höfðu ratað inn í meirihlutasáttmálann. Í dag tek ég sæti í borgarstjórn og fannst því tilvalið, í tilefni þess, og nú þegar kjörtímabilið er hálfnað, að hugsa til baka.

Ég er formaður Ungra vinstri grænna og horfi því eðlilega á hið pólitíska landslag með ungliðahreyfingargleraugun kyrfilega staðsett á nefinu. Fulltrúar VG í borginni hafa átt frumkvæði að og tekið þátt í gríðarlega mörgum góðum verkum sem gagnast ekki síst ungu fólki. Þar má nefna aukið framboð á hagkvæmu húsnæði, og þar auðvitað sérlega ánægjulegt að sjá mikla uppbyggingu stúdentagarða. Mikil áhersla hefur verið lögð á að brúa umönnunarbilið sem er gríðarlega mikilvægt fyrir ungar fjölskyldur. Einnig var systkinaafsláttur á vettvangi skóla- og frístundamála aukinn sem er mikil búbót fyrir barnmargar fjölskyldur. Almenningssamgöngur hafa fengið mikla athygli, og réttilega, enda mikilvægur liður í átt að vistvænni borg. Þar má nefna að framgangur borgarlínu hefur verið samþykktur, deilihjólaleigur hafa sprottið upp í borginni og fjármunum varið í uppbyggingu hjólastíga. Jafnréttismálin hafa verið í forgrunni, þar má til dæmis nefna kynjuð fjármál, og Bjarkarhlíð, sem er verkefni sem sett var af stað af fulltrúum VG, og hinsegin málefni hafa verið sett á oddinn. Allt eru þetta skref í áttina að því að gera Reykjavík að líflegri og aðlaðandi borg. Og í öllum þessum tilfellum hefur skipt gríðarlegu máli að VG eigi hlutdeild í meirihlutasamstarfinu.

Varafulltrúar VG fá reglulega tækifæri til að taka sæti þegar kjörnir fulltrúar, af einhverjum ástæðum, eru vant viðlátin. Og það er vel. En það er sérlega ánægjulegt að horfa yfir þann hóp varafulltrúa sem tekið hafa sæti fyrir hönd VG undanfarið á Alþingi, í sveitarstjórnum og í borginni og sjá að þar er ekki ein og ekki tvær ungar konur. Ungar konur, og ungt fólk, hefur fengið tækifæri til að spreyta sig sem varamenn í VG. En betur má ef duga skal, og hvet ég okkur öll til að hafa unga fólkið og mikilvægi radda þeirra í huga í komandi kosningum. Ef við raunverulega viljum ,,ungt fólk til áhrifa,“ eins og okkur er tíðrætt um, verðum við að tryggja að ungt fólk sé raunverulega í áhrifastöðum á listum um land allt. Það er mikilvægt að allar raddir heyrist og sem fjölbreyttastur hópur fólks eigi sæti við ákvarðanatökuborðið. Að því sögðu er ég þakklát fyrir tækifærið til að setjast við það borð í ráðhúsinu í dag.

Vinstrihreyfingin – grænt framboð

Túngötu 14

101 Reykjavík

vg@vg.is

KT: 421298-2709

Þessi síða styðst við vafrakökur (cookies) til að bæta virkni síðunnar. Með því að vafra um síðuna samþykkir þú notkun þeirra.