Bílum sem ganga eingöngu fyrir jarðefnaeldsneyti hefur fjölgað ört á síðustu árum. Því var það mjög eðlilegt skref þegar við hjónin ákváðum að skipta um bíl síðasta haust að skoða fleiri kosti en bensín eða díselbíla. Niðurstaðan var að kaupa okkur tvinnbíl, sem gengur bæði fyrir rafmagni og bensíni. Ástæða þess að kaupa slíkan bíl er fyrst og fremst sú að við búum í blokk í Kópavogi og þar getum við ekki komið upp okkar eigin hleðslustöð þar sem bílastæðin eru ekki sérmerkt hverri íbúð. En við töldum það í lagi þar sem hægt er að hlaða í vinnu eiginmannsins og þar sem bíllinn er einnig bensínbíll þá þyrftum við ekki að treysta alfarið á að komast í hleðslu.
Ég fór hins vegar að skoða málið betur, í Kópavogi eru ekki margir staðir þar sem hægt er að hlaða rafmagnsbíla gegn gjaldi. Eftir því sem ég best fæ séð er engin stöð á Kársnesi, nokkrar við Smáralind og Smáratorg og einnig nokkrar í Kórahverfi. Hins vegar eru þær töluvert mikið fleiri í Reykjavík og Garðabæ, sem eru þau sveitafélög sem liggja næst Kópavogi.
Hvar er mitt val?
Þegar ég sem íbúi hér í Kópavogi vil eiga þess kost að kaupa mér rafmagnsbíl þá þarf ég annað hvort að búa í sérbýli með sér bílastæði til að koma upp eigin hleðslustöð eða hreinlega sleppa því. Íbúasamtökin þar sem ég bý hafa reynt að eiga samtal við Kópavogsbæ um stuðning við að setja upp hleðslustöðvar við okkar blokkir, til að íbúar hér geti átt val um sinn ferðamáta. Þar sem Kópavogsbær á hluta þeirra bílastæða sem eru hér í kring þá vildu íbúasamtökin fá bæinn með í verkefnið, setja upp nokkrar hleðslustöðvar sem íbúar gætu nýtt til hleðslu, með þá einhverskonar lyklum fyrir hvern og einn og rukkað eftir því. Eftir því sem ég kemst næst þá hafa undirtektir bæjarins ekki verið miklar svo verið er að skoða aðra kosti. Á meðan dregst verkið og fólk þarf að bíða lengur eftir hleðslustöðvum og því er val íbúanna ekki mikið eins og er.
VG í Kópavogi er með á sinni stefnuskrá að Kópavogsbær geti styrkt fyrirtæki og einstaklinga, þar með talið húsfélög, við uppsetningu rafhleðslustöðva. Þannig geta allir valið sinn ferðamáta, rafmagnsbíll, hjól, ganga, strætó eða annað. Umhverfið græðir, börn okkar og barnabörn græða því með minni mengun þá skilum við jörðinni betur frá okkur til okkar afkomenda.
Göngum lengra með VG í Kópavogi – Kópavogur fyrir okkur öll.
Höfundur greinar er Ásta Kristín Guðmundsdóttir, félagsráðgjafi MA, skipar annað sæti á lista VG og er formaður VG í Kópavogi