Aðgengi er lykillinn að samfélaginu. Það er verkefni mitt sem ráðherra fatlaðs fólks að fjarlægja þröskulda sem hamla þátttöku í samfélaginu. Frumvarp sem ég mælti nýverið fyrir á Alþingi er gott dæmi um að brjóta múra. Verði fyrirhugaðar breytingar að veruleika mun það bæta stöðu fatlaðs fólks með langvarandi stuðningsþarfir, óháð þjónustuformi eða búsetu.
Aðstoðarmannakort fatlaðs fólks
Í fyrsta lagi munu breytingarnar hafa í för með sér að ráðherra getur sett reglugerð sem leiðir til þess að sveitarfélög gefi út svokölluð aðstoðarmannakort til handa fötluðu fólki. Aðstoðarmannakortið gildir þá fyrir aðstoðarmann fatlaðs einstaklings og hægt er framvísa því til dæmis þegar farið er í sund, á safn eða í leikhús á vegum hins opinbera. Þetta kemur í veg fyrir að fatlaður einstaklingur þurfi að borga viðbótarkostnað fyrir aðstoðarmann sinn. Hér er því um mikið jafnréttismál að ræða.
Hvet fyrirtæki til að taka þátt
Ég mun líka efna til átaks í samvinnu við Samtök atvinnulífsins til þess að fá fyrirtæki með okkur í lið þannig að þau samþykki aðstoðarmannakort hjá sér. Þetta gæti til dæmis átt við á líkamsræktarstöðvum, í kvikmyndahúsum og svo mætti áfram telja.
Fæðiskostnaður lendi ekki á fötluðu fólki
Í öðru lagi á að samræma reglur um fæðiskostnað starfsfólks sem vinnur með fötluðu fólki. Núverandi fyrirkomulag um fæðiskostnað er mismunandi á milli sveitarfélaga. En vandamálið er að ekki er tryggt að fæðispeningarnir dugi fyrir matarkostnaði og því getur komið upp sú staða að notandi þurfi að greiða sjálfur það sem upp á vantar. Verði frumvarpið að lögum getur ráðherra kveðið á um í reglugerð að fatlað fólk skuli ekki bera kostnað af fæði starfsfólks sem vinnur með því.
Réttur til sjálfstæðs lífs styrktur
Fyrirhugaðar lagabreytingar munu hafa jákvæð áhrif á stöðu og tækifæri fatlaðs fólks til þátttöku í samfélaginu án aðgreiningar og stuðla að rétti þeirra til að lifa sjálfstæðu lífi. Breytingunum er ætlað að stuðla að auknu jafnrétti í þjónustu, sem er eitt af grundvallarmarkmiðum samnings Sameinuðu þjóðanna um réttindi fatlaðs fólks. Lagabreytingin hefur verið unnin í góðu samráði við fatlað fólk og hagsmunasamtök þeirra og fulltrúa sveitarfélaga. Frumvarpið er ein aðgerða í nýrri landsáætlun í málefnum fatlaðs fólks sem samþykkt var á Alþingi nýlega.