Þóra Elfa Björnson. Ræða af flokksráðsfundi

Deildu 

Kæru Vinstri grænu félagar hvaðan sem þið komið af landinu – það er mál að sameinast og segja einum rómi að við mótmælum þeirri aðför sem gerð er að landinu og náttúru þess og auðæfum undir merkjum orkuöflunnar.

Við vitum að athafnamenn með glampa í augum og erlenda fjársterka aðila að baki sér skipuleggja tækifæri til að sölsa undir sig þessar auðlindir sem eru eign þjóðarinnar  – allt í nafni aukinnar orku. Það gleymist að segja okkur fyrir hvern þessi orka er eða til hvers á að nota hana, einnig að gróðinn fer úr landi.

Hvergi er sagt hve mikla orku við hér á landi þurfum til þess að halda okkar störfum og lífi gangandi með skynsamlegri orkunotkun, við erum ekki stærð í þessu reikningsdæmi, hvað þá að við höfum eitthvað að segja um ákvarðanir um þessi mál.  Hvergi er talað upphátt um eyðileggingu vegna rasks og náttúruspjalla vegna framkvæmda, hvað þá að nefnd sé ábyrgð vegna afleiðinganna.  Hvort sem um er að ræða virkjanir, vindmyllusmíðar, kolefnisfótspor vegna stórkarlalegs akstur á vikri til sjávar  eða alls konar aðgerðirsem þarf til þess að fá þessa hluti til að ganga upp að þeirra hætti.

Og á okkar orka að fara í gröft  eftir rafmynt? Ég segi nei, takk, hafið það bara heima hjá ykkur, athafnamenn.

Þessari aðför að orkugjöfum og landssvæðum okkar verður að linna, allri orkuvinnslu sem á að setja í gang verður að stýra með afgerandi og ljósum hætti, ekki hopa fyrir nýjum úttektum stjörnulögfræðinga og gróðamarkmiðum þeirra sem að baki standa.

Það verður að ákveða núna hvað af náttúru Íslands börn framtíðarinnar taka í arf því við höfum ekki leyfi til að rýra það sem þau eiga að taka við.

Erum við sammála þessu VG-félagar? Heyri ég í ykkur?

Vinstrihreyfingin – grænt framboð

Túngötu 14

101 Reykjavík

vg@vg.is

KT: 421298-2709

Þessi síða styðst við vafrakökur (cookies) til að bæta virkni síðunnar. Með því að vafra um síðuna samþykkir þú notkun þeirra.