Yfirlýsing þingflokks Vinstri hreyfingarinnar – græns framboðs vegna innrásar tyrkneska hersins inn í Norður-Sýrland.

Þingflokkur Vinstri hreyfingarinnar – græns framboðs fordæmir harðlega innrás tyrkneska hersins inn í Norður-Sýrland.

Það er ljóst að innrás tyrkneska hersins inn í annað ríki, stangast á við alþjóðalög, ógnar viðkvæmu ástandi á stríðshrjáðu svæði, ýtir undir mannskæðar ofsóknir í garð Kúrda og er mjög líklegt til að styrkja ISIS hryðjuverksamtökin á svæðinu við botni Miðjarðarhafs og stuðla að pólitískum óstöðugleika á svæðinu sem bitna muni hvað verst á saklausum borgurum.

Þingflokkur Vinstri hreyfingarinnar græns framboðs ítrekar mikilvægi friðsamlegrar uppbyggingar í Sýrlandi eftir 8 ára borgarastyrjöld sem kostaði mörg hundruð þúsund mannslíf og hrakti milljónir á flótta, bæði innan og utan Sýrlands.

Hvetur þingflokkurinn ríkisstjórn Íslands til að beita sér í hvívetna gegn áframhaldandi stríðsátökum í Sýrlandi sem mun ávallt bitna mest á börnum og konum og tala ávallt fyrir friðsamlegri uppbyggingu Sýrlands með aðkomu fjölþjóðlegra stofnanna.