Saga VG er komin út á tuttugu ára afmæli hreyfingarinnar. 

Þar er rakin saga hreyfingar sem umbreyttist frá því að vera lítill, áberandi andófsflokkur í að verða sá næststærsti á Alþingi og leiðandi í ríkisstjórn. 

„Ég fékk fullt frelsi við ritun og efnisöflun, þ.m.t. óheft aðgengi að fundargerðum og öðrum skjölum úr starfi VG, stjórnar og þingflokks,“ Pétur Hrafn Árnason – höfundur 

Pétur Hrafn er sjálfstætt starfandi sagnfræðingur og hefur m.a. verið ritstjóri í ritröðinni Sögu Íslands og aðalhöfundur síðasta bindis hennar. 

Sagan hefst á miklum umrótatímum í íslenskri pólitík árið 1998 þegar nýtt flokkamynstur verður til á vinstrivæng stjórnmálanna. Á skjótum tíma varð til róttækt stjórnmálaafl sem sumir spáðu skömmum líftíma. Sviptingar í stjórnmálalífinu breyttu stöðu hreyfingarinnar óvænt og leiddu til þátttöku hennar í tveimur ríkisstjórnum síðasta áratuginn, hvort tveggja við krefjandi aðstæður. 

 „Þetta er ekki einungis saga tuttugu ára í tilveru Vinstrihreyfingarinnar – græns framboðs. Þetta er líka saga íslenskra stjórnmála á miklum breytingatímum. Þetta er saga íslensks samfélags og þetta er saga stjórnmálafólks sem hefur lagt allt undir til að berjast fyrir sínum hugsjónum og ná fram umbótum fyrir samfélagið allt.“  Katrín Jakobsdóttir

Í sögu VG er ekkert dregið undan. Hún er á köflum átakasaga og sannkallaður reyfari. Enginn stjórnmálaáhugamaður má láta þessa bók fram hjá sér fara.