Forval í sex efstu sæti framboðslista Vinstri grænna á Akureyri til bæjarstjórnar fer fram dagana 2. til 5. mars. Niðurstaðan fyrir fyrstu þrjú sætin er bindandi. Kjörstjórn Vinstri grænna á Akureyri hvetur alla félaga sem vilja hafa áhrif og leggja sitt af mörkum til að bjóða sig fram.

Forvalið verður rafrænt og hefst kl. 00:00 miðvikudaginn 2. mars og lýkur kl. 17:00 laugardaginn 5. mars. Kosningarétt í forvalinu hafa félagar í Vinstri grænum á Akureyri og nágrenni sem eru skráðir félagar tíu dögum fyrir upphaf kosningar, og því þurfa nýir félagar að skrá sig í síðasta lagi fyrir miðnætti aðfaranótt sunnudagsins 20. febrúar til að geta kosið. Til að greiða atkvæði í forvalinu þarf að auðkenna sig með Íslykli eða rafrænum skilríkjum. Um forvalið gilda reglur Vinstri hreyfingarinnar – græns framboðs um forval.

Þegar niðurstöður forvals liggja fyrir mun kjörstjórn vinna tillögu að fullskipuðum framboðslista sem lögð verður fram til samþykkis á félagsfundi Vinstri grænna í Akureyri og nágrenni. Kjörstjórn mun nota aðferð uppstillingar í sæti 7 til 22 og hvetur kjörstjórn félaga sem hafa áhuga á að sitja í þeim sætum að senda póst á netfang kjörstjórnar.

Öllum fyrirspurnum og ábendingum er hægt að koma á framfæri við kjörstjórn á netfangið akureyri@vg.is.

Þau sem vilja gefa kost á sér eða stinga upp á fólki skulu tilkynna það skriflega til kjörstjórnar í tölvupósti á netfangið akureyri@vg.is

Nánari upplýsingar veitir Hlynur Hallsson, formaður kjörstjórnar, í síma 659 4744.